chhuTTi ka zamana

schōl band haiñ sab ab sair ko hai jaanā

likhnā hai ab na paḌhnā bas chhuTTiyāñ manānā

basta kitāb copy sab chhuTTiyāñ manā.eñ

bār-e-girāñ se in ke ham bhī najāt paa.eñ

baste meñ jo bañdhā hai us ko jahāñ meñ dekheñ

kyā kyā kahāñ chhupā hai aao pata lagā.eñ

sunte haiñ kuchh ajab hai duniyā kā kār-ḳhāna

likhnā hai ab na paḌhnā bas chhuTTiyāñ manānā

aao suneñ kahānī koī na.ī purānī

naanī sunā.eñ yā phir daadī kī ho zabānī

ik rākshas bhī aa.e ho ḳhuub khīñchā-tānī

aisī laḌā.ī ho ki aa jaa.e yaad naanī

phir ḳhātma meñ aa kar dushman kā haar jaanā

likhnā hai ab na paḌhnā bas chhuTTiyāñ manānā

bas khelne kī ḳhātir ye chhuTTiyāñ milī haiñ

har-sū khilāḌiyoñ kī kuchh Toliyāñ banī haiñ

lahrā rahe haiñ balle geñdeñ uchhal rahī haiñ

fōtbāl kī bhī Teameñ maidāñ meñ aa ga.ī haiñ

tagḌā muqābla hai kuchh kar ke hai dikhānā

likhnā hai ab na paḌhnā bas chhuTTiyāñ manānā

har samt har Dagar par chhuTTī kā raaj qaa.em

ā.ankhoñ meñ jhilmilāte haiñ sair ke azā.em

jī chāhtā hai sadiyoñ zinda raheñ yahāñ ham

qaa.em rahe ye chhuTTī daa.im rahe ye mausam

bas soch hī to hai ye mumkin nahīñ ye maanā

likhnā hai ab na paḌhnā bas chhuTTiyāñ manānā

school band hain sab ab sair ko hai jaana

likhna hai ab na paDhna bas chhuTTiyan manana

basta kitab copy sab chhuTTiyan manaen

bar-e-giran se in ke hum bhi najat paen

baste mein jo bandha hai us ko jahan mein dekhen

kya kya kahan chhupa hai aao pata lagaen

sunte hain kuchh ajab hai duniya ka kar-KHana

likhna hai ab na paDhna bas chhuTTiyan manana

aao sunen kahani koi nai purani

nani sunaen ya phir dadi ki ho zabani

ek rakshas bhi aae ho KHub khincha-tani

aisi laDai ho ki aa jae yaad nani

phir KHatma mein aa kar dushman ka haar jaana

likhna hai ab na paDhna bas chhuTTiyan manana

bas khelne ki KHatir ye chhuTTiyan mili hain

har-su khilaDiyon ki kuchh Toliyan bani hain

lahra rahe hain balle genden uchhal rahi hain

footbaal ki bhi Teamen maidan mein aa gai hain

tagDa muqabla hai kuchh kar ke hai dikhana

likhna hai ab na paDhna bas chhuTTiyan manana

har samt har Dagar par chhuTTi ka raj qaem

aaankhon mein jhilmilate hain sair ke azaem

ji chahta hai sadiyon zinda rahen yahan hum

qaem rahe ye chhuTTi daim rahe ye mausam

bas soch hi to hai ye mumkin nahin ye mana

likhna hai ab na paDhna bas chhuTTiyan manana