election ke din

sunā.eñ tumheñ baat ik raat kī

election ke din kī siyah raat thī

vo voToñ kī gintī vo hullaḌ vo shor

the jam.a vahāñ par ka.ī vote chor

machī ek halchal sī elaan se

ki jiite haiñ buddhū baḌī shaan se

nazar aa.e Daale gale meñ vo haar

the piTThū bhī hamrāh un ke hazār

ka.ī chauñk uTThe unheñ dekh kar

ki the film ke actor beshtar

shrī buddhā raa.e vo mash.hūr haiñ

siyāsat meñ aa kar vo maġhrūr haiñ

paḌī ek laḌke kī un par nazar

pakaḌ hī liyā bhiiḌ meñ dauḌ kar

kahā mere hero zarā nāchiye

vo filmī kathā.eñ zarā bāñchiye

flat aap kā hai baḌā shāndār

badalte haiñ har saal a.alā sī car

girā.eñge kitne ġharīboñ ke ghar

ġharībī ko ro.eñge phir baiTh kar

ye maanā ki ūñche adākār haiñ

ġharīboñ ke dukh se ḳhabar-dār haiñ

jahezī chitāoñ kā uThtā dhuāñ

sunātā dukhoñ kī hai kyā dāstāñ

ka.ī baar aa.ī hai filmī qazā

ajī jiite jī maut kyā hai bhalā

diyā sun ke netā ne us ko javāb

siyāsat kī bāzīgarī hai janāb

ki zarre ko chamkā.e juuñ āftāb

siyāsat kā hai ab to ḳhāna-ḳharāb

adākār filmī haiñ ham to magar

nahīñ ham se kam ye purāne magar

magarmachh ke aañsū bahāte haiñ sab

nigal kar ye jantā ko khāte haiñ sab

uchhal kuud kar dauḌ kar bhaag kar

dikhāte haiñ jantā ko apnā hunar

ye ham se bhī baḌh kar adākār haiñ

ye jo des-bhagTī ke autār haiñ

sunaen tumhein baat ek raat ki

election ke din ki siyah raat thi

wo woTon ki ginti wo hullaD wo shor

the jama wahan par kai wote chor

machi ek halchal si elan se

ki jite hain buddhu baDi shan se

nazar aae Dale gale mein wo haar

the piTThu bhi hamrah un ke hazar

kai chaunk uTThe unhen dekh kar

ki the film ke actor beshtar

shri buddha rae wo mashhur hain

siyasat mein aa kar wo maghrur hain

paDi ek laDke ki un par nazar

pakaD hi liya bhiD mein dauD kar

kaha mere hero zara nachiye

wo filmi kathaen zara banchiye

flat aap ka hai baDa shandar

badalte hain har sal aala si car

giraenge kitne gharibon ke ghar

gharibi ko roenge phir baiTh kar

ye mana ki unche adakar hain

gharibon ke dukh se KHabar-dar hain

jahezi chitaon ka uThta dhuan

sunata dukhon ki hai kya dastan

kai bar aai hai filmi qaza

aji jite ji maut kya hai bhala

diya sun ke neta ne us ko jawab

siyasat ki bazigari hai janab

ki zarre ko chamkae jun aaftab

siyasat ka hai ab to KHana-KHarab

adakar filmi hain hum to magar

nahin hum se kam ye purane magar

magarmachh ke aansu bahate hain sab

nigal kar ye janta ko khate hain sab

uchhal kud kar dauD kar bhag kar

dikhate hain janta ko apna hunar

ye hum se bhi baDh kar adakar hain

ye jo des-bhagTi ke autar hain