kitaben

samajhtā hai ise saarā zamāna

kitābeñ ilm-o-hikmat kā ḳhazāna

diloñ kā nuur haiñ achchhī kitābeñ

charāġh-e-tūr haiñ achchhī kitābeñ

hamārī mūnis o ġham-ḳhvār haiñ ye

jihād-e-ilm kī lalkār haiñ ye

kitābeñ kyā haiñ rūhānī ḳhudā haiñ

sakūñ dil kā davāoñ kī davā haiñ

hamārī kyuuñ na ho manzil kitābeñ

rasūloñ par huiiñ nāzil kitābeñ

kitāboñ se hai jis kī āshnā.ī

baḌī daulat jahāñ meñ us ne paa.ī

kitābeñ kāmyābī kā haiñ ziina

rakheñ ābād ye dil kā madīna

kitāboñ kī rifāqat bhī ajab hai

ta.alluq toḌnā in se ġhazab hai

sadāqat kā yahī rasta dikhā.eñ

buroñ ko bhī yahī achchhā banā.eñ

sikhātī haiñ ye jiine kā tarīqa

batātī haiñ hameñ kyā hai salīqa

kisī ne muñh kitāboñ se jo pherā

yaqīnan us ko zillat ne hai gherā

kitāboñ se agar ḳhālī makāñ hai

vo hai bhūtoñ kā maskan ghar kahāñ hai

kitāboñ se halāvat guftugū meñ

sharāfat kā asar baaqī lahū meñ

kitāboñ se jahāñ meñ naam zinda

hamārī sub.h zinda shaam zinda

kitāboñ se sadā rishta baḌhāo

isī meñ zindagī apnī lagāo

samajhta hai ise sara zamana

kitaben ilm-o-hikmat ka KHazana

dilon ka nur hain achchhi kitaben

charagh-e-tur hain achchhi kitaben

hamari munis o gham-KHwar hain ye

jihad-e-ilm ki lalkar hain ye

kitaben kya hain ruhani KHuda hain

sakun dil ka dawaon ki dawa hain

hamari kyun na ho manzil kitaben

rasulon par huin nazil kitaben

kitabon se hai jis ki aashnai

baDi daulat jahan mein us ne pai

kitaben kaamyabi ka hain zina

rakhen aabaad ye dil ka madina

kitabon ki rifaqat bhi ajab hai

talluq toDna in se ghazab hai

sadaqat ka yahi rasta dikhaen

buron ko bhi yahi achchha banaen

sikhati hain ye jine ka tariqa

batati hain hamein kya hai saliqa

kisi ne munh kitabon se jo phera

yaqinan us ko zillat ne hai ghera

kitabon se agar KHali makan hai

wo hai bhuton ka maskan ghar kahan hai

kitabon se halawat guftugu mein

sharafat ka asar baqi lahu mein

kitabon se jahan mein nam zinda

hamari subh zinda sham zinda

kitabon se sada rishta baDhao

isi mein zindagi apni lagao