man ka KHwab

maiñ soī jo ik shab to dekhā ye ḳhvāb

baḌhā aur jis se mirā iztirāb

ye dekhā ki maiñ jā rahī huuñ kahīñ

añdherā hai aur raah miltī nahīñ

laraztā thā Dar se mirā baal baal

qadam kā thā dahshat se uThnā muhāl

jo kuchh hausla pā ke aage baḌhī

to dekhā qatār ek laḌkoñ kī thī

zamurrad sī poshāk pahne hue

diye sab ke hāthoñ meñ jalte hue

vo chup-chāp the aage pīchhe ravāñ

ḳhudā jaane jaanā thā un ko kahāñ

isī soch meñ thī ki merā pisar

mujhe is jamā.at meñ aayā nazar

vo pīchhe thā aur tez chaltā na thā

diyā us ke hāthoñ meñ jaltā na thā

kahā maiñ ne pahchān kar merī jaañ

mujhe chhoḌ kar aa ga.e tum kahāñ

judā.ī meñ rahtī huuñ maiñ be-qarār

pirotī huuñ har roz ashkoñ ke haar

na parvā hamārī zarā tum ne kī

ga.e chhoḌ achchhī vafā tum ne kī

jo bachche ne dekhā mirā pech-o-tāb

diyā us ne muñh pher kar yuuñ javāb

rulātī hai tujh ko judā.ī mirī

nahīñ is meñ kuchh bhī bhalā.ī mirī

ye kah kar vo kuchh der tak chup rahā

diyā phir dikhā kar ye kahne lagā

samajhtī hai tū ho gayā kyā ise?

tire āñ.suoñ ne bujhāyā ise!

main soi jo ek shab to dekha ye KHwab

baDha aur jis se mera iztirab

ye dekha ki main ja rahi hun kahin

andhera hai aur rah milti nahin

larazta tha Dar se mera baal baal

qadam ka tha dahshat se uThna muhaal

jo kuchh hausla pa ke aage baDhi

to dekha qatar ek laDkon ki thi

zamurrad si poshak pahne hue

diye sab ke hathon mein jalte hue

wo chup-chap the aage pichhe rawan

KHuda jaane jaana tha un ko kahan

isi soch mein thi ki mera pisar

mujhe is jamaat mein aaya nazar

wo pichhe tha aur tez chalta na tha

diya us ke hathon mein jalta na tha

kaha main ne pahchan kar meri jaan

mujhe chhoD kar aa gae tum kahan

judai mein rahti hun main be-qarar

piroti hun har roz ashkon ke haar

na parwa hamari zara tum ne ki

gae chhoD achchhi wafa tum ne ki

jo bachche ne dekha mera pech-o-tab

diya us ne munh pher kar yun jawab

rulati hai tujh ko judai meri

nahin is mein kuchh bhi bhalai meri

ye kah kar wo kuchh der tak chup raha

diya phir dikha kar ye kahne laga

samajhti hai tu ho gaya kya ise?

tere aansuon ne bujhaya ise!