raat

gayā din huī shaam aa.ī hai raat

ḳhudā ne ajab shai banā.ī hai raat

na ho raat to din kī pahchān kyā

uThā.e maza din kā insān kyā

huī raat ḳhilqat chhuTī kaam se

ḳhamoshī sī chhā.ī sar-e-shām se

lage hone ab hot bāzār band

zamāne ke sab kaar behvār band

musāfir ne din bhar kiyā hai safar

sar-e-shām manzil pe kholī kamar

daraḳhtoñ ke patte bhī chup ho ga.e

havā tham ga.ī peḌ bhī so ga.e

añdherā ujāle pe ġhālib huā

har ik shaḳhs rāhat kā tālib huā

hue raushan ābādiyoñ meñ charāġh

huā sab ko mehnat se hāsil farāġh

kisān ab chalā khet ko chhoḌ kar

ki ghar meñ kare chain se shab basar

ġharīb aadmī jo ki mazdūr haiñ

mashaqqat se jin ke badan chuur haiñ

vo din bhar kī mehnat ke maare hue

vo māñde thake aur haare hue

nihāyat ḳhushī se ga.e apne ghar

hue baal bachche bhī ḳhush dekh kar

ga.e bhuul sab kām-dhandhe kā ġham

savere ko uTTheñge ab tāza-dam

kahāñ chain ye bādshah ko nasīb

ki jis be-ġhamī se haiñ sote ġharīb

gaya din hui sham aai hai raat

KHuda ne ajab shai banai hai raat

na ho raat to din ki pahchan kya

uThae maza din ka insan kya

hui raat KHilqat chhuTi kaam se

KHamoshi si chhai sar-e-sham se

lage hone ab hot bazar band

zamane ke sab kar behwar band

musafir ne din bhar kiya hai safar

sar-e-sham manzil pe kholi kamar

daraKHton ke patte bhi chup ho gae

hawa tham gai peD bhi so gae

andhera ujale pe ghaalib hua

har ek shaKHs rahat ka talib hua

hue raushan aabaadiyon mein charagh

hua sab ko mehnat se hasil faragh

kisan ab chala khet ko chhoD kar

ki ghar mein kare chain se shab basar

gharib aadmi jo ki mazdur hain

mashaqqat se jin ke badan chur hain

wo din bhar ki mehnat ke mare hue

wo mande thake aur haare hue

nihayat KHushi se gae apne ghar

hue baal bachche bhi KHush dekh kar

gae bhul sab kaam-dhandhe ka gham

sawere ko uTThenge ab taza-dam

kahan chain ye baadshah ko nasib

ki jis be-ghami se hain sote gharib