sawal

ammī javāb dījiye mere savāl kā

aatā nahīñ samajh meñ ki ye kyā hai mājrā

kartī haiñ aap ham ko nasīhat ye baar baar

hotā hai jhuuT bolne vaalā gunāhgār

kyā baat hai magar ki jo ham-sā.ī aa.ī thī

nanhe kī umr aap ne kyuuñ kam batā.ī thī

abbā the ghar meñ aaj magar un ke dost se

ghar meñ nahīñ haiñ vo ye kahlvāyā kis liye

chāchā miThā.ī laa.e the parsoñ jo shaam ko

dī thī hameñ to aap ne thoḌī sī naam ko

us ko chhupā ki kahne lagīñ ḳhatm ho ga.ī

us vaqt jhuuT kahnā na thī baat kyā burī

ammī hameñ na ġhusse se āñkheñ dikhā.iye

kyā vāqa.ī hai jhuuT burā ye batā.iye

ammi jawab dijiye mere sawal ka

aata nahin samajh mein ki ye kya hai majra

karti hain aap hum ko nasihat ye bar bar

hota hai jhuT bolne wala gunahgar

kya baat hai magar ki jo ham-sai aai thi

nanhe ki umr aap ne kyun kam batai thi

abba the ghar mein aaj magar un ke dost se

ghar mein nahin hain wo ye kahlwaya kis liye

chacha miThai lae the parson jo sham ko

di thi hamein to aap ne thoDi si nam ko

us ko chhupa ki kahne lagin KHatm ho gai

us waqt jhuT kahna na thi baat kya buri

ammi hamein na ghusse se aankhen dikhaiye

kya waqai hai jhuT bura ye bataiye