surayya ki guDiya

suno ik maze kī kahānī suno

kahānī hamārī zabānī suno

surayyā kī guḌiyā thī chhoTī bahut

na dublī bahut aur na moTī bahut

jo dekho to nannhī sī guḌiyā thī vo

magar ik sharārat kī puḌiyā thī vo

jo sotī to din raat sotī thī vo

jo rotī to din raat rotī thī vo

na ammī ke saath aur na bhayyā ke saath

vo har vaqt rahtī surayyā ke saath

surayyā ne ik din ye us se kahā

mirī nannhī guḌiyā yahāñ baiTh jā

bulāyā hai ammī ne aatī huuñ maiñ

khaTolī meñ tujh ko sulātī huuñ maiñ

vo nādān guḌiyā ḳhafā ho ga.ī

vo roī vo chillā.ī aur so ga.ī

achānak vahāñ ik parī aa ga.ī

khulī aañkh guḌiyā kī ghabrā ga.ī

to bolī parī muskurātī huī

sunahrī paroñ ko hilātī huī

''idhar aao tum mujh se bāteñ karo

maiñ nāzuk parī huuñ na mujh se Daro''

vo guḌiyā magar aur bhī Dar ga.ī

lagī chīḳhne ''hā.e maiñ mar ga.ī

''mirī pyārī aapā bachā lo mujhe

kisī koTharī meñ chhupā lo mujhe''

surayyā ne aa kar uThāyā use

uThā kar gale se lagāyā use

gale se lagāte hī chup ho ga.ī

vo chup ho ga.ī aur phir so ga.ī

surayyā ko dekhā parī uḌ ga.ī

jidhar se thī aa.ī udhar muḌ ga.ī

suno ek maze ki kahani suno

kahani hamari zabani suno

surayya ki guDiya thi chhoTi bahut

na dubli bahut aur na moTi bahut

jo dekho to nannhi si guDiya thi wo

magar ek shararat ki puDiya thi wo

jo soti to din raat soti thi wo

jo roti to din raat roti thi wo

na ammi ke sath aur na bhayya ke sath

wo har waqt rahti surayya ke sath

surayya ne ek din ye us se kaha

meri nannhi guDiya yahan baiTh ja

bulaya hai ammi ne aati hun main

khaToli mein tujh ko sulati hun main

wo nadan guDiya KHafa ho gai

wo roi wo chillai aur so gai

achanak wahan ek pari aa gai

khuli aankh guDiya ki ghabra gai

to boli pari muskuraati hui

sunahri paron ko hilati hui

idhar aao tum mujh se baaten karo

main nazuk pari hun na mujh se Daro

wo guDiya magar aur bhi Dar gai

lagi chiKHne hae main mar gai

miri pyari aapa bacha lo mujhe

kisi koThari mein chhupa lo mujhe

surayya ne aa kar uThaya use

uTha kar gale se lagaya use

gale se lagate hi chup ho gai

wo chup ho gai aur phir so gai

surayya ko dekha pari uD gai

jidhar se thi aai udhar muD gai