baDa pur-haul rasta tha

baḌā pur-haul rasta thā

badan ke jauhar-e-ḳhufta meñ koī quvvat-e-lāhūt mudġham thī

kisī ġhuul bayābānī kī gardish mere dast-o-pā kī mahram thī

dahān-e-jāñ se ḳhārij hone vaalī bhaap meñ the sālimāt-e-dard raushan

guzargāhoñ ke sab nā-mo'tabar patthar

ḳhalā meñ uḌne vaalī past miTTī ke siyah zarre

pahāḌ aur aa.ine saa.e kure peḌoñ ke patte

pāniyoñ kī gol lahreñ

raat kī lā-ilm chīzeñ

shash-jihat ke sab anāsir zor se pīchhe haTe the

aur maiñ aage hazāroñ kos aage baḌh gayā thā

ik ajab raftār merī aag meñ thī

kis qadar pur-haul rasta thā

paḌāv ke liye kitne jazīre darmiyāñ aa.e

zamīñ muḌ muḌ ke aa.ī aur ik ik kar ke sātoñ āsmāñ aa.e

musalsal chal rahā thā maiñ

havā meñ Dhal rahā thā maiñ

masāmoñ se shuā-e-be-nihāyat phūTī paḌtī thī

abad kā ik jaḌāv taaj mere sar pe rakhā thā

baḌā pur-haul rasta thā

koī barq-e-shabāhat ārzū-bardār merī aag meñ thī

ik ajab raftār merī aag meñ thī

baDa pur-haul rasta tha

badan ke jauhar-e-KHufta mein koi quwwat-e-lahut mudgham thi

kisi ghul bayabani ki gardish mere dast-o-pa ki mahram thi

dahan-e-jaan se KHarij hone wali bhap mein the salimat-e-dard raushan

guzargahon ke sab na-mo'tabar patthar

KHala mein uDne wali past miTTi ke siyah zarre

pahaD aur aaine sae kure peDon ke patte

paniyon ki gol lahren

raat ki la-ilm chizen

shash-jihat ke sab anasir zor se pichhe haTe the

aur main aage hazaron kos aage baDh gaya tha

ek ajab raftar meri aag mein thi

kis qadar pur-haul rasta tha

paDaw ke liye kitne jazire darmiyan aae

zamin muD muD ke aai aur ek ek kar ke saton aasman aae

musalsal chal raha tha main

hawa mein Dhal raha tha main

masamon se shua-e-be-nihayat phuTi paDti thi

abad ka ek jaDaw taj mere sar pe rakha tha

baDa pur-haul rasta tha

koi barq-e-shabahat aarzu-bardar meri aag mein thi

ek ajab raftar meri aag mein thi