baghawat kaun kare

is kumba-parvar duniyā meñ bekas kī himāyat kaun kare

jab ġhāsib munsif ban jaa.eñ insāf kī zahmat kaun kare

jo farq samajhte haiñ ab tak hindī sindhī punjabi meñ

in aql ke puure logoñ se laḌne kī himāqat kaun kare

jo luT kar aa.e haiñ un ko sabr aate aate aa.egā

lekin is behis duniyā meñ ehsās-e-haqīqat kaun kare

kyā rahnā aisī bastī meñ har baat jahāñ kī ulTī ho

jab baaz hī khet kā dushman ho phir is kī hifāzat kaun kare

ma.alūm ye hotā hai ab tak yūsuf ke barādar zinda haiñ

jab apne dushman ho jaa.eñ ġhairoñ kī shikāyat kaun kare

in khāte-pīte logoñ se ye baat koī pūchhe jā kar

zardāroñ kī dāvat tum ne kī nādār kī dāvat kaun kare

mahloñ ke sunahrī pardoñ meñ har aib hunar ban jaatā hai

lekin in daulat-mandoñ ko jhuTlāne kī jur.at kaun kare

ham sab kuchh kar sakte haiñ magar ye soch ke phir rah jaate haiñ

tum laakh bure ho apne ho apnoñ se baġhāvat kaun kare

is kumba-parwar duniya mein bekas ki himayat kaun kare

jab ghasib munsif ban jaen insaf ki zahmat kaun kare

jo farq samajhte hain ab tak hindi sindhi punjabi mein

in aql ke pure logon se laDne ki himaqat kaun kare

jo luT kar aae hain un ko sabr aate aate aaega

lekin is behis duniya mein ehsas-e-haqiqat kaun kare

kya rahna aisi basti mein har baat jahan ki ulTi ho

jab baz hi khet ka dushman ho phir is ki hifazat kaun kare

malum ye hota hai ab tak yusuf ke baradar zinda hain

jab apne dushman ho jaen ghairon ki shikayat kaun kare

in khate-pite logon se ye baat koi puchhe ja kar

zardaron ki dawat tum ne ki nadar ki dawat kaun kare

mahlon ke sunahri pardon mein har aib hunar ban jata hai

lekin in daulat-mandon ko jhuTlane ki jurat kaun kare

hum sab kuchh kar sakte hain magar ye soch ke phir rah jate hain

tum lakh bure ho apne ho apnon se baghawat kaun kare