bahadur shah zafar

ik yahāñ bādshāh thā bachcho

mulk kā ḳhair-ḳhvāh thā bachcho

sab ko bhātī thī nek ḳhū us kī

ḳhuub lagtī thī guftugū us kī

vo ki sher-o-adab kā māhir thā

dar-haqīqat aziim shā.ir thā

naam us ne abū-zafar paayā

āḳhirī tājdār kahlāyā

us kī azmat pe dil hai farsh-e-rāh

us ko kahte the sab bahādur shaah

taḳht-e-dillī pe hukmarāñ thā vo

muġhliya daur kā nishāñ thā vo

ahal-e-hindostāñ kā qaa.id thā

vo muhibb-e-vatan mujāhid thā

raas us ko na taḳht-e-shāhī thā

vo ki ik bā-vafā sipāhī thā

us ke apne hī ek rishta-dār

nañg-e-hindostāñ hue ġhaddār

kar ke añgrez be-bas-o-majbūr

le ga.e phir use vatan se duur

zulm añgrez kā sahā barsoñ

qaid rañgūn meñ rahā barsoñ

ek yahan baadshah tha bachcho

mulk ka KHair-KHwah tha bachcho

sab ko bhati thi nek KHu us ki

KHub lagti thi guftugu us ki

wo ki sher-o-adab ka mahir tha

dar-haqiqat azim shair tha

nam us ne abu-zafar paya

aaKHiri tajdar kahlaya

us ki azmat pe dil hai farsh-e-rah

us ko kahte the sab bahadur shah

taKHt-e-dilli pe hukmaran tha wo

mughliya daur ka nishan tha wo

ahal-e-hindostan ka qaid tha

wo muhibb-e-watan mujahid tha

ras us ko na taKHt-e-shahi tha

wo ki ek ba-wafa sipahi tha

us ke apne hi ek rishta-dar

nang-e-hindostan hue ghaddar

kar ke angrez be-bas-o-majbur

le gae phir use watan se dur

zulm angrez ka saha barson

qaid rangun mein raha barson