bahaar aai

bahār aa.ī to jaise yak-bār

lauT aa.e haiñ phir adam se

vo ḳhvāb saare shabāb saare

jo tere hoñToñ pe mar-miTe the

jo miT ke har baar phir jiye the

nikhar ga.e haiñ gulāb saare

jo terī yādoñ se mushkbū haiñ

jo tere ushshāq kā lahū haiñ

ubal paḌe haiñ azaab saare

malāl-e-ahvāl-e-dostāñ bhī

ḳhumār-e-āġhosh-e-mah-vashāñ bhī

ġhubār-e-ḳhātir ke baab saare

tire hamāre

savāl saare javāb saare

bahār aa.ī to khul ga.e haiñ

na.e sire se hisāb saare

bahaar aai to jaise yak-bar

lauT aae hain phir adam se

wo KHwab sare shabab sare

jo tere honTon pe mar-miTe the

jo miT ke har bar phir jiye the

nikhar gae hain gulab sare

jo teri yaadon se mushkbu hain

jo tere ushshaq ka lahu hain

ubal paDe hain azab sare

malal-e-ahwal-e-dostan bhi

KHumar-e-aghosh-e-mah-washan bhi

ghubar-e-KHatir ke bab sare

tere hamare

sawal sare jawab sare

bahaar aai to khul gae hain

nae sire se hisab sare