bahaar aur main

bahār-dar-bahār hai

chaman meñ ye pukār hai

fazā-e-murġh-zār hai

havā-e-ḳhush-gavār hai

chalo chalo umang meñ

baḌho baḌho tarang meñ

guloñ pe ik nikhār hai

zamīn lāla-zār hai

ḳhayāl sho.ala-bār hai

nigāh be-qarār hai

bahār go hai josh par

ḳhizāñ hai us ke dosh par

jo bahr hai ḳhush-āb hai

vo ḳhush hai jo habāb hai

samāñ hī lā-javāb hai

sukūñ meñ iztirāb hai

nikhār hai siñgār hai

ubhār hī ubhār hai

na koī rāzdār hai

na koī ġham-gusār hai

na dil pe iḳhtiyār hai

na jī kā e.atibār hai

ajiib merā haal hai

ki zindagī vabāl hai

chaman hai saarā ḳhanda-zan

tuyūr sab haiñ naġhma-zan

khaḌī huī hai har phaban

ḳhizāñ kā pahne pairahan

rahegā husn-e-dahr kyā

na Dhā.egā ye qahr kyā

na dil kā intiḳhāb hai

na koī be-hijāb hai

na ālam-e-shabāb hai

jo dekhtā huuñ ḳhvāb hai

jahān ko baqā kahāñ

karam kahāñ vafā kahāñ

bahaar-dar-bahaar hai

chaman mein ye pukar hai

faza-e-murgh-zar hai

hawa-e-KHush-gawar hai

chalo chalo umang mein

baDho baDho tarang mein

gulon pe ek nikhaar hai

zamin lala-zar hai

KHayal shoala-bar hai

nigah be-qarar hai

bahaar go hai josh par

KHizan hai us ke dosh par

jo bahr hai KHush-ab hai

wo KHush hai jo habab hai

saman hi la-jawab hai

sukun mein iztirab hai

nikhaar hai singar hai

ubhaar hi ubhaar hai

na koi raazdar hai

na koi gham-gusar hai

na dil pe iKHtiyar hai

na ji ka eatibar hai

ajib mera haal hai

ki zindagi wabaal hai

chaman hai sara KHanda-zan

tuyur sab hain naghma-zan

khaDi hui hai har phaban

KHizan ka pahne pairahan

rahega husn-e-dahr kya

na Dhaega ye qahr kya

na dil ka intiKHab hai

na koi be-hijab hai

na aalam-e-shabab hai

jo dekhta hun KHwab hai

jahan ko baqa kahan

karam kahan wafa kahan