bahrupni

ek gardan pe saikḌoñ chehre

aur har chehre par hazāroñ daaġh

aur har daaġh band darvāza

raushnī in se aa nahīñ saktī

raushnī in se jā nahīñ saktī

tañg siina hai hauz masjid kā

dil vo duunā pujāriyoñ ke ba.ad

chāTte rahte haiñ jise kutte

kutte duunā jo chaaT lete haiñ

devtāoñ ko kaaT lete haiñ

jaane kis kokh ne janā is ko

jaane kis sehn meñ javān huī

jaane kis des se chalī kam-baḳht

vaise ye har zabān boltī hai

zaḳhm khiḌkī kī tarah kholtī hai

aur kahtī hai jhāñk kar dil meñ

terā maz.hab, tirā aziim ḳhudā

terī tahzīb ke hasīn sanam

sab ko ḳhatre ne aaj gherā hai

ba.ad un ke jahāñ añdherā hai

sard ho jaatā hai lahū merā

band ho jaatī haiñ khulī āñkheñ

aisā lagtā hai jaise duniyā meñ

sabhī dushman haiñ koī dost nahīñ

mujh ko zinda nigal rahī hai zamīñ

aisā lagtā hai rākshas koī

ek gāgar kamar meñ laTkā kar

āsmāñ par chaḌhegā āḳhir-e-shab

nuur saarā nichoḌ lā.egā

mere taare bhī toḌ lā.egā

ye jo dhartī kā phaT gayā siina

aur bāhar nikal paḌe haiñ julūs

mujh se kahte haiñ tum hamāre ho

maiñ agar in kā huuñ to maiñ kyā huuñ

maiñ kisī kā nahīñ huuñ apnā huuñ

mujh ko tanhā.ī ne diyā hai janam

merā sab kuchh akele-pan se hai

kaun pūchhegā mujh ko mele meñ

saath jis din qadam baḌhā.ūñgā

chaal maiñ apnī bhuul jā.ūñgā

ye aur aise hī chand aur savāl

DhūñDne par bhī aaj tak mujh ko

jin ke maañ baap kā milā na surāġh

zehn meñ ye uñDel detī hai

mujh ko muTThī meñ bheñch letī hai

chāhtā huuñ ki qatl kar duuñ ise

vaar lekin jab is pe kartā huuñ

mere siine pe zaḳhm ubharte haiñ

mere māthe se ḳhuuñ Tapaktā hai

jaane kyā merā is kā rishta hai

āñdhiyoñ meñ azaan dī maiñ ne

sañkh phūñkā añdherī rātoñ meñ

ghar ke bāhar salīb laTkā.ī

ek ik dar se us ko Thukrāyā

shahr se duur jā ke pheñk aayā

aur elaan kar diyā ki uTho

barf sī jam ga.ī hai sīnoñ meñ

garm bosoñ se us ko pighlā do

kar lo jo bhī gunāh vo kam hai

aaj kī raat jashn-e-ādam hai

ye mirī āstīn se niklī

rakh diyā dauḌ ke charāġh pe haath

mal diyā phir añdherā chehre par

hoñT se dil kī baat lauT ga.ī

dar tak aa ke barāt lauT ga.ī

us ne mujh ko alag bulā ke kahā

aaj kī zindagī kā naam hai ḳhauf

ḳhauf hī vo zamīn hai jis meñ

firqe ugte haiñ firqe palte haiñ

dhāre sāgar se kaT ke chalte haiñ

ḳhauf jab tak diloñ meñ baaqī hai

sirf chehra badalte rahnā hai

sirf lahja badalte rahnā hai

koī mujh ko miTā nahīñ saktā

jashn-e-ādam manā nahīñ saktā

ek gardan pe saikDon chehre

aur har chehre par hazaron dagh

aur har dagh band darwaza

raushni in se aa nahin sakti

raushni in se ja nahin sakti

tang sina hai hauz masjid ka

dil wo duna pujariyon ke baad

chaTte rahte hain jise kutte

kutte duna jo chaT lete hain

dewtaon ko kaT lete hain

jaane kis kokh ne jana is ko

jaane kis sehn mein jawan hui

jaane kis des se chali kam-baKHt

waise ye har zaban bolti hai

zaKHm khiDki ki tarah kholti hai

aur kahti hai jhank kar dil mein

tera mazhab, tera azim KHuda

teri tahzib ke hasin sanam

sab ko KHatre ne aaj ghera hai

baad un ke jahan andhera hai

sard ho jata hai lahu mera

band ho jati hain khuli aankhen

aisa lagta hai jaise duniya mein

sabhi dushman hain koi dost nahin

mujh ko zinda nigal rahi hai zamin

aisa lagta hai rakshas koi

ek gagar kamar mein laTka kar

aasman par chaDhega aaKHir-e-shab

nur sara nichoD laega

mere tare bhi toD laega

ye jo dharti ka phaT gaya sina

aur bahar nikal paDe hain julus

mujh se kahte hain tum hamare ho

main agar in ka hun to main kya hun

main kisi ka nahin hun apna hun

mujh ko tanhai ne diya hai janam

mera sab kuchh akele-pan se hai

kaun puchhega mujh ko mele mein

sath jis din qadam baDhaunga

chaal main apni bhul jaunga

ye aur aise hi chand aur sawal

DhunDne par bhi aaj tak mujh ko

jin ke man bap ka mila na suragh

zehn mein ye unDel deti hai

mujh ko muTThi mein bhench leti hai

chahta hun ki qatl kar dun ise

war lekin jab is pe karta hun

mere sine pe zaKHm ubharte hain

mere mathe se KHun Tapakta hai

jaane kya mera is ka rishta hai

aandhiyon mein azan di main ne

sankh phunka andheri raaton mein

ghar ke bahar salib laTkai

ek ek dar se us ko Thukraya

shahr se dur ja ke phenk aaya

aur elan kar diya ki uTho

barf si jam gai hai sinon mein

garm boson se us ko pighla do

kar lo jo bhi gunah wo kam hai

aaj ki raat jashn-e-adam hai

ye meri aastin se nikli

rakh diya dauD ke charagh pe hath

mal diya phir andhera chehre par

honT se dil ki baat lauT gai

dar tak aa ke baraat lauT gai

us ne mujh ko alag bula ke kaha

aaj ki zindagi ka nam hai KHauf

KHauf hi wo zamin hai jis mein

firqe ugte hain firqe palte hain

dhaare sagar se kaT ke chalte hain

KHauf jab tak dilon mein baqi hai

sirf chehra badalte rahna hai

sirf lahja badalte rahna hai

koi mujh ko miTa nahin sakta

jashn-e-adam mana nahin sakta