bahut dinon baad

bahut dinoñ ba.ad

tere ḳhat ke udaas lafzoñ ne

terī chāhat ke zā.iqoñ kī tamām ḳhushbū

mirī ragoñ meñ uñDel dī hai

bahut dinoñ ba.ad

terī bāteñ

tirī mulāqāt kī dhanak se dahaktī rāteñ

ujaaḌ āñkhoñ ke pyaas pātāl kī tahoñ meñ

visāl-va.adoñ kī chand chiñgāriyoñ ko sāñsoñ kī aañch de kar

sharīr sho.aloñ kī sar-kashī ke tamām tevar

sikhā ga.ī haiñ

tire mahakte mahīn lafzoñ kī ābshāreñ

bahut dinoñ ba.ad phir se

mujh ko rulā ga.ī haiñ

bahut dinoñ ba.ad

maiñ ne sochā to yaad aayā

ki mere andar kī raakh ke Dher par abhī tak

tire zamāne likhe hue haiñ

sabhī fasāne likhe hue haiñ

bahut dinoñ ba.ad

maiñ ne sochā to yaad aayā

ki terī yādoñ kī kirchiyāñ

mujh se kho ga.ī haiñ

tire badan kī tamām ḳhushbū

bikhar ga.ī hai

tire zamāne kī chāhatīñ

sab nishāniyāñ

sab sharārteñ

sab hikāyateñ sab shikāyateñ jo kabhī hunar meñ

ḳhayāl thiiñ ḳhvāb ho ga.ī haiñ

bahut dinoñ ba.ad

maiñ ne sochā to yaad aayā

ki maiñ bhī kitnā badal gayā huuñ

bichhaḌ ke tujh se

ka.ī lakīroñ meñ Dhal gayā huuñ

maiñ apne cigarette ke be-irāda dhueñ kī sūrat

havā meñ tahlīl ho gayā huuñ

na DhūñDh merī vafā ke naqsh-e-qadam ke reze

ki maiñ to terī talāsh ke be-kanār sahrā meñ

vahm ke be-amāñ bagūloñ ke vaar sah kar

udaas rah kar

na-jāne kis rah meñ kho gayā huuñ

bichhaḌ ke tujh se tirī tarah kyā batā.ūñ maiñ bhī

na jaane kis kis kā ho gayā huuñ

bahut dinoñ ba.ad

maiñ ne sochā to yaad aayā

bahut dinon baad

tere KHat ke udas lafzon ne

teri chahat ke zaiqon ki tamam KHushbu

meri ragon mein unDel di hai

bahut dinon baad

teri baaten

teri mulaqat ki dhanak se dahakti raaten

ujaD aankhon ke pyas patal ki tahon mein

visal-wadon ki chand chingariyon ko sanson ki aanch de kar

sharir shoalon ki sar-kashi ke tamam tewar

sikha gai hain

tere mahakte mahin lafzon ki aabshaaren

bahut dinon baad phir se

mujh ko rula gai hain

bahut dinon baad

main ne socha to yaad aaya

ki mere andar ki rakh ke Dher par abhi tak

tere zamane likhe hue hain

sabhi fasane likhe hue hain

bahut dinon baad

main ne socha to yaad aaya

ki teri yaadon ki kirchiyan

mujh se kho gai hain

tere badan ki tamam KHushbu

bikhar gai hai

tere zamane ki chahatin

sab nishaniyan

sab shararten

sab hikayaten sab shikayaten jo kabhi hunar mein

KHayal thin KHwab ho gai hain

bahut dinon baad

main ne socha to yaad aaya

ki main bhi kitna badal gaya hun

bichhaD ke tujh se

kai lakiron mein Dhal gaya hun

main apne cigarette ke be-irada dhuen ki surat

hawa mein tahlil ho gaya hun

na DhunDh meri wafa ke naqsh-e-qadam ke reze

ki main to teri talash ke be-kanar sahra mein

wahm ke be-aman bagulon ke war sah kar

udas rah kar

na-jaane kis rah mein kho gaya hun

bichhaD ke tujh se teri tarah kya bataun main bhi

na jaane kis kis ka ho gaya hun

bahut dinon baad

main ne socha to yaad aaya