banawaTi dilase

ye aag paanī havā ye miTTī

ye vāhimoñ kī karishma-sāzī

ye ilm-o-fan ke tamām qisse

ye aql-o-dānish kī saarī bāteñ

ye sab dilāse banāvaTī haiñ

maiñ dostoñ dushmanoñ kī zad meñ huuñ

har koī pesh-goiyoñ ke darāz qisse sunā rahā hai

ki sab ko apne currency noToñ kī fikr hai

har koī talab aur rasad ke chakkar meñ

apne bhaav chaḌhā rahā hai

khulī fazāoñ meñ par sameTe hue parinde bhī

aane vaalī sa.ūbatoñ ke muhīb manzar dikhā rahe haiñ

ye kyā hai sab kuchh ki kuchh nahīñ hai

havās kī dastaras se baalā

mire liye sirf vo sadāqat hai

jo mire jism-o-jāñ ko chhū kar guzar rahī hai

ki maiñ haqīqī mushāhidoñ tajraboñ kī bhaTTī meñ jal rahā huuñ

ye aag paanī havā na miTTī hai

sirf maiñ huuñ

ye sirf maiñ huuñ

ye aag pani hawa ye miTTi

ye wahimon ki karishma-sazi

ye ilm-o-fan ke tamam qisse

ye aql-o-danish ki sari baaten

ye sab dilase banawaTi hain

main doston dushmanon ki zad mein hun

har koi pesh-goiyon ke daraaz qisse suna raha hai

ki sab ko apne currency noTon ki fikr hai

har koi talab aur rasad ke chakkar mein

apne bhaw chaDha raha hai

khuli fazaon mein par sameTe hue parinde bhi

aane wali saubaton ke muhib manzar dikha rahe hain

ye kya hai sab kuchh ki kuchh nahin hai

hawas ki dastaras se baala

mere liye sirf wo sadaqat hai

jo mere jism-o-jaan ko chhu kar guzar rahi hai

ki main haqiqi mushahidon tajrabon ki bhaTTi mein jal raha hun

ye aag pani hawa na miTTi hai

sirf main hun

ye sirf main hun