bargad se wapsi

vo bachchī gum-shuda hairat se āsār-e-qadīma vaalā safha khaul kar

schōl kī book paḌh rahī hai

use mālūm hī kab hai

jise nirvān miltā hai

vo sadiyāñ oḌh kar safhoñ meñ buddhā ban ke rahtā hai

vo paḌhte paḌhte jab tasvīr par nazreñ jamātī hai

to us ko, aañkh ke halqoñ meñ murda ḳhvāhishoñ kī zardiyāñ mahsūs hotī haiñ

ghane bargad ke saa.e meñ paḌe rahne se

us kī gaal pe sūraj kā bosa hī nahīñ hai

us ke sar ke baal kī sab tāzgī jañgal ke sabze meñ paḌī hai

use buddhā pe raham aayā

vo bachchī haath meñ pencil pakaḌ kar sochtī hai

aur phir tasvīr ke uupar

lakīreñ khīñch kar moñchheñ banātī hai

aur is tabdīlī se andar hī andar muskurātī hai

ki jaise us ne dānish kī sabhī kamzoriyāñ

apnī lakīroñ se chhupā dī haiñ

use mālūm hī kab hai

ki us ke haath kī jumbish ne andar kī

sabhī ālā.isheñ chehre pe rakh dī haiñ

vo jin ko jism se āzād kar ke ek arse se tyāgī thā

ab āsār-e-qadīma vaale safhe par 'danāyā' aur 'satā' ke koī mafhūm hī baaqī nahīñ haiñ

zarā moñchheñ banāne se sabhī dukh miT ga.e haiñ

marg' kī koī zarūrat hī nahīñ

buddhā kapilvastu kā shahzāda dobāra ban gayā hai

wo bachchi gum-shuda hairat se aasar-e-qadima wala safha khaul kar

school ki book paDh rahi hai

use malum hi kab hai

jise nirwan milta hai

wo sadiyan oDh kar safhon mein buddha ban ke rahta hai

wo paDhte paDhte jab taswir par nazren jamati hai

to us ko, aankh ke halqon mein murda KHwahishon ki zardiyan mahsus hoti hain

ghane bargad ke sae mein paDe rahne se

us ki gal pe suraj ka bosa hi nahin hai

us ke sar ke baal ki sab tazgi jangal ke sabze mein paDi hai

use buddha pe raham aaya

wo bachchi hath mein pencil pakaD kar sochti hai

aur phir taswir ke upar

lakiren khinch kar monchhen banati hai

aur is tabdili se andar hi andar muskuraati hai

ki jaise us ne danish ki sabhi kamzoriyan

apni lakiron se chhupa di hain

use malum hi kab hai

ki us ke hath ki jumbish ne andar ki

sabhi aalaishen chehre pe rakh di hain

wo jin ko jism se aazad kar ke ek arse se tyagi tha

ab aasar-e-qadima wale safhe par 'danaya' aur 'sata' ke koi mafhum hi baqi nahin hain

zara monchhen banane se sabhi dukh miT gae hain

marg' ki koi zarurat hi nahin

buddha kapilwastu ka shahzada dobara ban gaya hai