sawan ke mahine

firdaus banā.e hue sāvan ke mahīne

ik gul-ruḳh o nasrīñ-badan o sarv-e-sahī ne

māthe pe idhar kākul-e-zholīda kī lahreñ

gardūñ pe udhar abr-e-ḳhirāmāñ ke safīne

meñh jitnā barastā thā sar-e-dāman-e-kohsār

itne hī zamīñ apnī ugaltī thī dafīne

allāh-re ye farmān ki is mast havā meñ

ham muñh se na boleñge agar pī na kisī ne

vo mūnis-o-ġham-ḳhvār thā jis ke liye barsoñ

māñgī thiiñ duā.eñ mire āġhosh-e-tahī ne

gul-rez the sāhil ke lachakte hue paude

gul-rañg the tālāb ke tarshe hue ziine

bārish thī lagātār to yuuñ gard thī mafqūd

jis tarah mai-e-nāb se dhul jaate haiñ siine

dam bhar ko bhī thamtī thiiñ agar sard havā.eñ

aate the javānī ko pasīne pe pasīne

bhar dī thī chaTānoñ meñ bhī ġhunchoñ kī sī narmī

ik fitna-e-kaunain kī nāzuk-badanī ne

getī se ubalte the tamannā ke salīqe

gardūñ se baraste the mohabbat ke qarīne

kyā dil kī tamannāoñ ko marbūt kiyā thā

sabze pe chamaktī huī sāvan kī jhaḌī ne

badlī thī falak par ki junūñ-ḳhez javānī

būñdeñ thiiñ zamīñ par ki añgūThī ke nagīne

shāḳhoñ pe parinde the jhaTakte hue shahpar

nahroñ meñ bateñ apne ubhāre hue siine

is fasl meñ is darja rahā be-ḳhud o sarshār

maiḳhāne se bāhar mujhe dekhā na kisī ne

kyā lamha-e-fānī thā ki muḌ kar bhī na dekhā

dī kitnī hī āvāz hayāt-e-abadī ne

firdaus banae hue sawan ke mahine

ek gul-ruKH o nasrin-badan o sarw-e-sahi ne

mathe pe idhar kakul-e-zholida ki lahren

gardun pe udhar abr-e-KHiraman ke safine

meinh jitna barasta tha sar-e-daman-e-kohsar

itne hi zamin apni ugalti thi dafine

allah-re ye farman ki is mast hawa mein

hum munh se na bolenge agar pi na kisi ne

wo munis-o-gham-KHwar tha jis ke liye barson

mangi thin duaen mere aaghosh-e-tahi ne

gul-rez the sahil ke lachakte hue paude

gul-rang the talab ke tarshe hue zine

barish thi lagatar to yun gard thi mafqud

jis tarah mai-e-nab se dhul jate hain sine

dam bhar ko bhi thamti thin agar sard hawaen

aate the jawani ko pasine pe pasine

bhar di thi chaTanon mein bhi ghunchon ki si narmi

ek fitna-e-kaunain ki nazuk-badani ne

geti se ubalte the tamanna ke saliqe

gardun se baraste the mohabbat ke qarine

kya dil ki tamannaon ko marbut kiya tha

sabze pe chamakti hui sawan ki jhaDi ne

badli thi falak par ki junun-KHez jawani

bunden thin zamin par ki anguThi ke nagine

shaKHon pe parinde the jhaTakte hue shahpar

nahron mein baten apne ubhaare hue sine

is fasl mein is darja raha be-KHud o sarshaar

maiKHane se bahar mujhe dekha na kisi ne

kya lamha-e-fani tha ki muD kar bhi na dekha

di kitni hi aawaz hayat-e-abadi ne