barkha-rut

āsmāñ par chhā rahā hai abr-pāroñ kā hujūm!

nau-bahāroñ kā hujūm

aah ye rañgīn āvāra nazāroñ kā hujūm

kohsāroñ kā hujūm

badliyāñ haiñ yā kisī ke bhūle-bisre ḳhvāb haiñ

be-ḳhud o betāb haiñ!

yā havā par tairtā hai rūd-bāroñ kā hujūm

ābshāroñ kā hujūm

phirtī haiñ āvāra matvālī ghaTā.eñ is tarah

aur havā.eñ is tarah

jhūmtā phirtā ho jaise mai-gusāroñ kā hujūm

bāda-ḳhvāroñ kā hujūm

vādī-e-gañgā hai, barkhā-rut hai, kaalī raat hai

raat hai barsāt hai

aur fazā meñ tairne vaale nazāroñ kā hujūm

nashsha-zāroñ kā hujūm

nīl-gūñ pariyāñ ufuq meñ par haiñ phailā.e hue

baal bikhrā.e hue

yā umañD aayā hai sāvan kī bahāroñ kā hujūm

abr-pāroñ kā hujūm

nannhī nannhī būñdeñ girtī haiñ hijāb-e-abr se

yā naqāb-e-abr se

chhan rahā hai qatre ban ban kar sitāroñ kā hujūm

nūr-pāroñ kā hujūm

ye ghaTā.eñ haiñ ki ḳhvāboñ ke safīne haiñ ravāñ

be-qarīne haiñ ravāñ

bādbānoñ meñ chhupā.e chashma-sāroñ kā hujūm

jū-e-bāroñ kā hujūm

bijlī hai yā nuur kī zanjīr lahrā.ī huī

pech-o-ḳham khaa.ī huī

yā ḳhamīda marmarīñ phūloñ ke hāroñ kā hujūm

aur sitāroñ kā hujūm

ye samāñ bijlī kā ye mahtāb kī sī vādiyāñ

ḳhvāb kī sī vādiyāñ

nashshe meñ bhīgā huā ye sabza-zāroñ kā hujūm

kohsāroñ meñ ḳhushī kī bastiyāñ ābād haiñ

mastiyāñ ābād haiñ

chār-sū bikhrā paḌā hai sabza-zāroñ kā hujūm

marġh-zāroñ kā hujūm

yuuñ nazar aate haiñ kohsār-e-masūrī duur se

mast se maḳhmūr se

juuñ samundar se jazīroñ kī qatāroñ kā hujūm

sabza-zāroñ kā hujūm

ye safar, ye raat, ye barsāt aur phir ham-safar

al-amān o al-hazar

ek husn-e-yāsmīñ rañgīñ bahāroñ kā hujūm

māh-pāroñ kā hujūm

ye suhāne manzar aḳhtar muddatoñ yaad ā.eñge

muddatoñ taḌpāyeñge

aah ye raat, uf ye mastāna nazāroñ kā hujūm

ye bahāroñ kā hujūm

aasman par chha raha hai abr-paron ka hujum!

nau-bahaaron ka hujum

aah ye rangin aawara nazaron ka hujum

kohsaron ka hujum

badliyan hain ya kisi ke bhule-bisre KHwab hain

be-KHud o betab hain!

ya hawa par tairta hai rud-baron ka hujum

aabshaaron ka hujum

phirti hain aawara matwali ghaTaen is tarah

aur hawaen is tarah

jhumta phirta ho jaise mai-gusaron ka hujum

baada-KHwaron ka hujum

wadi-e-ganga hai, barkha-rut hai, kali raat hai

raat hai barsat hai

aur faza mein tairne wale nazaron ka hujum

nashsha-zaron ka hujum

nil-gun pariyan ufuq mein par hain phailae hue

baal bikhrae hue

ya umanD aaya hai sawan ki bahaaron ka hujum

abr-paron ka hujum

nannhi nannhi bunden girti hain hijab-e-abr se

ya naqab-e-abr se

chhan raha hai qatre ban ban kar sitaron ka hujum

nur-paron ka hujum

ye ghaTaen hain ki KHwabon ke safine hain rawan

be-qarine hain rawan

baadbanon mein chhupae chashma-saron ka hujum

ju-e-baron ka hujum

bijli hai ya nur ki zanjir lahrai hui

pech-o-KHam khai hui

ya KHamida marmarin phulon ke haaron ka hujum

aur sitaron ka hujum

ye saman bijli ka ye mahtab ki si wadiyan

KHwab ki si wadiyan

nashshe mein bhiga hua ye sabza-zaron ka hujum

kohsaron mein KHushi ki bastiyan aabaad hain

mastiyan aabaad hain

chaar-su bikhra paDa hai sabza-zaron ka hujum

margh-zaron ka hujum

yun nazar aate hain kohsar-e-masuri dur se

mast se maKHmur se

jun samundar se jaziron ki qataron ka hujum

sabza-zaron ka hujum

ye safar, ye raat, ye barsat aur phir ham-safar

al-aman o al-hazar

ek husn-e-yasmin rangin bahaaron ka hujum

mah-paron ka hujum

ye suhane manzar aKHtar muddaton yaad aaenge

muddaton taDpayenge

aah ye raat, uf ye mastana nazaron ka hujum

ye bahaaron ka hujum