barkha-rut

garmī kī tapish bujhāne vaalī

sardī kā payām laane vaalī

qudrat ke ajā.ibāt kī kaañ

aarif ke liye kitāb-e-irfāñ

vo shāḳh-o-daraḳht kī javānī

vo mor-o-malaḳh kī zindagānī

vo saare baras kī jaan barsāt

vo kaun-e-ḳhudā kī shaan barsāt

aa.ī hai bahut duāoñ ke ba.ad

vo saikḌoñ iltijāoñ ke ba.ad

vo aa.ī to aa.ī jaan meñ jaañ

sab the koī din ke varna mehmāñ

garmī se taḌap rahe the jān-dār

aur dhuup meñ tap rahe the kohsār

bhūbal se sivā thā reg-e-sahrā

aur khaul rahā thā āb-e-dariyā

sāñDe the biloñ meñ muñh chhupā.e

aur haañp rahe the chārpā.e

thiiñ lomaḌiyāñ zabāñ nikāle

aur lū se hiran hue the kaale

chītoñ ko na thī shikār kī sudh

hirnoñ ko na thī qatār kī sudh

the sher paḌe kachhār meñ sust

ghaḌiyāl the rūd-bār meñ sust

Dhoroñ kā huā thā haal patlā

bailoñ ne diyā thā Daal kandhā

bhaiñsoñ ke lahū na thā badan meñ

aur duudh na thā ga.ū ke than meñ

ghoḌoñ kā chhuTā thā ghaas daana

thā pyaas kā un pe tāziyāna

garmī kā lagā huā thā bhabkā

aur ans nikal rahā thā sab kā

tūfān the āñdhiyoñ ke barpā

uThtā thā bagūle par bagūlā

aare the badan pe lū ke chalte

sho.ale the zamīn se nikalte

thī aag kā de rahī havā kaam

thā aag kā naam muft bad-nām

rastoñ meñ savār aur paidal

sab dhuup ke haath se the bekal

ghoḌoñ ke na aage uThte the paañv

miltī thī kahīñ jo ruukh kī chhāñv

thī sab kī nigāh sū-e-aflāk

paanī kī jagah barastī thī ḳhaak

garmi ki tapish bujhane wali

sardi ka payam lane wali

qudrat ke ajaibaat ki kan

aarif ke liye kitab-e-irfan

wo shaKH-o-daraKHt ki jawani

wo mor-o-malaKH ki zindagani

wo sare baras ki jaan barsat

wo kaun-e-KHuda ki shan barsat

aai hai bahut duaon ke baad

wo saikDon iltijaon ke baad

wo aai to aai jaan mein jaan

sab the koi din ke warna mehman

garmi se taDap rahe the jaan-dar

aur dhup mein tap rahe the kohsar

bhubal se siwa tha reg-e-sahra

aur khaul raha tha aab-e-dariya

sanDe the bilon mein munh chhupae

aur hanp rahe the chaarpae

thin lomaDiyan zaban nikale

aur lu se hiran hue the kale

chiton ko na thi shikar ki sudh

hirnon ko na thi qatar ki sudh

the sher paDe kachhaar mein sust

ghaDiyal the rud-bar mein sust

Dhoron ka hua tha haal patla

bailon ne diya tha Dal kandha

bhainson ke lahu na tha badan mein

aur dudh na tha gau ke than mein

ghoDon ka chhuTa tha ghas dana

tha pyas ka un pe taziyana

garmi ka laga hua tha bhabka

aur ans nikal raha tha sab ka

tufan the aandhiyon ke barpa

uThta tha bagule par bagula

aare the badan pe lu ke chalte

shoale the zamin se nikalte

thi aag ka de rahi hawa kaam

tha aag ka nam muft bad-nam

raston mein sawar aur paidal

sab dhup ke hath se the bekal

ghoDon ke na aage uThte the panw

milti thi kahin jo rukh ki chhanw

thi sab ki nigah su-e-aflak

pani ki jagah barasti thi KHak