barqi mohabbat

ga.e vaqtoñ meñ mohabbat

dil pe likhī anmiT tahrīr hotī thī

sunā hai patthar par lakīr hotī thī

magar ab haath meñ thāme kisī

barqī aale ke buttonoñ meñ uljhī hai

uñglī aur añgūThe par ba-vaqt-e-zarūrat

thiraktī rahtī hai

barqī paiġhāmāt ke ḳhāne meñ paḌe

chand be-libās fiqre

mohabbat kī alāmat ban ga.e haiñ

kisī purāne daur meñ

mohabbat dil se nikālnā ek jokhim thā

magar ab sunā hai ki

is ke liye delete ke ka.ī

option ījād ho chuke haiñ

raat ke chor añdhere meñ

koī raushan scrēn par

apne lams se likhtā hai

tumheñ chhū luuñ

bas ab mohabbat

rābte kī is sadī meñ

āḳhirī sāñsoñ ke darmiyān

ek hichkī pe aTkī huī hai

ki ab mohabbat mahsūs karne se

ziyāda chhū lene kī koshish hai

gae waqton mein mohabbat

dil pe likhi anmiT tahrir hoti thi

suna hai patthar par lakir hoti thi

magar ab hath mein thame kisi

barqi aale ke buttonon mein uljhi hai

ungli aur anguThe par ba-waqt-e-zarurat

thirakti rahti hai

barqi paighamat ke KHane mein paDe

chand be-libas fiqre

mohabbat ki alamat ban gae hain

kisi purane daur mein

mohabbat dil se nikalna ek jokhim tha

magar ab suna hai ki

is ke liye delete ke kai

option ijad ho chuke hain

raat ke chor andhere mein

koi raushan screen par

apne lams se likhta hai

tumhein chhu lun

bas ab mohabbat

rabte ki is sadi mein

aaKHiri sanson ke darmiyan

ek hichki pe aTki hui hai

ki ab mohabbat mahsus karne se

ziyaada chhu lene ki koshish hai