barsat

bādal garaj rahā hai bijlī chamak rahī hai

pur-kaif haiñ fazā.eñ har shai damak rahī hai

bād-e-ḳhunuk chaman meñ bal khā ke chal rahī hai

barg-e-hinā kī rañgat pahlū badal rahī hai

chehre pe yāsiyat ke nūr-e-shabāb chhāyā

maḳhmal kā sabz qālīñ fitrat ne yuuñ bichhāyā

māyūs har shajar ne badlā libās apnā

har murġh-e-ḳhush-navā ne chheḌā nayā tarānā

niklī sadā-e-bulbul koyal kī kuuk gūñjī

chiḌiyoñ kī chahchahāhaT lutf-e-hayāt laa.ī

tezī meñ aa ga.ī hai dariyāoñ kī ravānī

maidān khet bastī har samt paanī paanī

chashme ubal rahe haiñ nahreñ shabāb par haiñ

naġhmāt-e-naujavānī chañg-o-rubāb par haiñ

phūloñ se aur phaloñ se shāḳh-e-shajar ladī hai

ushshāq ke diloñ meñ uljhan sī paḌ ga.ī hai

sarsabz ho gayā hai vīrān saarā jañgal

jañgal meñ mach gayā hai har-sū ḳhushī kā mañgal

ḳhushbū-e-jāñ-fazā se har jānvar magan hai

un ke rag-e-amal meñ vo josh maujzan hai

in.ām-e-be-bahā hai qudrat kā ye nazārā

'sāhil' sukūn-e-dil hai fitrat kā ye nazārā

baadal garaj raha hai bijli chamak rahi hai

pur-kaif hain fazaen har shai damak rahi hai

baad-e-KHunuk chaman mein bal kha ke chal rahi hai

barg-e-hina ki rangat pahlu badal rahi hai

chehre pe yasiyat ke nur-e-shabab chhaya

maKHmal ka sabz qalin fitrat ne yun bichhaya

mayus har shajar ne badla libas apna

har murgh-e-KHush-nawa ne chheDa naya tarana

nikli sada-e-bulbul koyal ki kuk gunji

chiDiyon ki chahchahahaT lutf-e-hayat lai

tezi mein aa gai hai dariyaon ki rawani

maidan khet basti har samt pani pani

chashme ubal rahe hain nahren shabab par hain

naghmat-e-naujawani chang-o-rubab par hain

phulon se aur phalon se shaKH-e-shajar ladi hai

ushshaq ke dilon mein uljhan si paD gai hai

sarsabz ho gaya hai viran sara jangal

jangal mein mach gaya hai har-su KHushi ka mangal

KHushbu-e-jaan-faza se har jaanwar magan hai

un ke rag-e-amal mein wo josh maujzan hai

inam-e-be-baha hai qudrat ka ye nazara

'sahil' sukun-e-dil hai fitrat ka ye nazara