barsat ki bahaaren

haiñ is havā meñ kyā kyā barsāt kī bahāreñ

sabzoñ kī lahlahāhaT bāġhāt kī bahāreñ

būñdoñ kī jhamjhamāvaT qatrāt kī bahāreñ

har baat ke tamāshe har ghaat kī bahāreñ

kyā kyā machī haiñ yaaro barsāt kī bahāreñ

bādal havā ke uupar ho mast chhā rahe haiñ

jhaḌiyoñ kī mastiyoñ se dhūmeñ machā rahe haiñ

paḌte haiñ paanī har jā jal-thal banā rahe haiñ

gulzār bhīgte haiñ sabze nahā rahe haiñ

kyā kyā machī haiñ yaaro barsāt kī bahāreñ

maare haiñ mauj Dābar dariyā dauñD rahe haiñ

mor-o-papīhe koyal kyā kyā rumañD rahe haiñ

jhaḌ kar rahī haiñ jhaḌiyāñ naale umañD rahe haiñ

barse hai muñh jhaḌā jhaḌ bādal ghumanD rahe haiñ

kyā kyā machī haiñ yaaro barsāt kī bahāreñ

jañgal sab apne tan par hariyālī saj rahe haiñ

gul phuul jhāḌ-būTe kar apnī dhaj rahe haiñ

bijlī chamak rahī hai bādal garaj rahe haiñ

allāh ke naqāre naubat ke baj rahe haiñ

kyā kyā machī haiñ yaaro barsāt kī bahāreñ

bādal lagā Takoreñ naubat kī gat lagāveñ

jheñgur jhañgār apnī surnā.iyañ bajāveñ

kar shor mor bagule jhaḌiyoñ kā muñh bulāveñ

pī pī kareñ papīhe meñDak malāreñ gāveñ

kyā kyā machī haiñ yaaro barsāt kī bahāreñ

har jā bichhā rahā hai sabza hare bichhaune

qudrat ke bichh rahe haiñ har jā hare bichhaune

jañgaloñ meñ ho rahe haiñ paidā hare bichhaune

bichhvā diye haiñ haq ne kyā kyā hare bichhaune

kyā kyā machī haiñ yaaro barsāt kī bahāreñ

sabzoñ kī lahlahāhaT kuchh abr kī siyāhī

aur chhā rahī ghaTā.eñ surḳh aur safed kaahī

sab bhīgte haiñ ghar ghar le māh-tā-ba-māhī

ye rañg kaun rañge tere sivā ilāhī

kyā kyā machī haiñ yaaro barsāt kī bahāreñ

kyā kyā rakhe haiñ yārab sāmān terī qudrat

badle hai rañg kyā kyā har aan terī qudrat

sab mast ho rahe pahchān terī qudrat

tītar pukārte haiñ sub.hān terī qudrat

kyā kyā machī haiñ yaaro barsāt kī bahāreñ

koyal kī kuuk meñ bhī terā hī naam haigā

aur mor kī zaTal meñ terā payām haigā

ye rañg sau maze kā jo sub.h-o-shām haigā

ye aur kā nahīñ hai terā hī kaam haigā

kyā kyā machī haiñ yaaro barsāt kī bahāreñ

bolīñ ba.e baTereñ qumrī pukāre kū-kū

pī pī kare papīhā bagule pukāreñ tū-tū

kyā hudhudoñ kī haq haq kyā fāḳhatoñ kī hū-hū

sab raT rahe haiñ tujh ko kyā pañkh kyā pakherū

kyā kyā machī haiñ yaaro barsāt kī māreñ

jo mast hoñ idhar ke kar shor nāchte haiñ

pyāre kā naam le kar kyā zor nāchte haiñ

bādal havā se kar kar ghanghor nāchte haiñ

meñDak uchhal rahe haiñ aur mor nāchte haiñ

kyā kyā machī haiñ yaaro barsāt kī bahāreñ

phūloñ kī sej uupar sote haiñ kitne ban-ban

so haiñ gulābī joḌe phūloñ ke haar abran

kitnoñ ke ghar hai khānā sonā lage hai āñgan

kone meñ paḌ rahī haiñ sar muñh lapeT sogan

kyā kyā machī haiñ yaaro barsāt kī bahāreñ

jo ḳhush haiñ vo ḳhushī meñ kaaTe haiñ raat saarī

jo ġham meñ haiñ unhoñ par guzre hai raat bhārī

sīnoñ se lag rahī haiñ jo haiñ piyā kī pyārī

chhātī phaTe hai un kī jo haiñ birah kī maarī

kyā kyā machī haiñ yaaro barsāt kī bahāreñ

jo vasl meñ haiñ un ke juuḌe mahak rahe haiñ

jhūloñ meñ jhūlte haiñ gahne jhamak rahe haiñ

jo dukh meñ haiñ so un ke siine phaḌak rahe haiñ

aaheñ nikal rahī haiñ aañsū Tapak rahe haiñ

kyā kyā machī haiñ yaaro barsāt kī bahāreñ

ab birhanoñ ke uupar hai saḳht be-qarārī

har buuñd mārtī hai siine upar kaTārī

badlī kī dekh sūrat kahtī haiñ baarī baarī

hai hai na lī piyā ne ab ke bhī sudh hamārī

kyā kyā machī haiñ yaaro barsāt kī bahāreñ

jab koyal apnī un ko āvāz hai sunātī

sunte hī ġham ko maare chhātī hai umñDī aatī

pī pī kī dhun ko sun kar be-kal haiñ kahtī jaatī

mat bol ai papīhe phaTtī hai merī chhātī

kyā kyā machī haiñ yaaro barsāt kī bahāreñ

hai jin kī sej suunī aur ḳhālī chārpā.ī

ro ro unhoñ ne har-dam ye baat hai sunā.ī

pardesī ne hamārī ab ke bhī sudh bhulā.ī

ab ke bhī chhāvnī jā pardes meñ hai chhā.ī

kyā kyā machī haiñ yaaro barsāt kī bahāreñ

kitnoñ ne apnī ġham se ab hai ye gat banā.ī

maile kuchaile kapḌe āñkheñ bhī DabDabā.ī

ne ghar meñ jhūlā Daalā ne oḌhnī rañgā.ī

phūTā paḌā hai chūlhā TuuTī paḌī kaḌhā.ī

kyā kyā machī haiñ yaaro barsāt kī bahāreñ

gaatī hai giit koī jhūle pe kar ke pherā

maaro jī aaj kījiye yaañ rain kā baserā

hai ḳhush kisī ko aa kar hai dard-o-ġham ne gherā

muñh zard baal bikhre aur āñkhoñ meñ añdherā

kyā kyā machī haiñ yaaro barsāt kī bahāreñ

aur jin ko ab muhayyā husnoñ kī Dheriyāñ haiñ

surḳh aur sunahre kapḌe ishrat kī gheriyāñ haiñ

mahbūb dilbaroñ kī zulfeñ bikheriyāñ haiñ

jugnū chamak rahe haiñ rāteñ añdheriyāñ haiñ

kyā kyā machī haiñ yaaro barsāt kī bahāreñ

kitne to bhañg pī pī kapḌe bhigo rahe haiñ

bāheñ guloñ meñ Daale jhūloñ meñ so rahe haiñ

kitne birah ke maare sudh apnī kho rahe haiñ

jhūle kī dekh sūrat har aan ro rahe haiñ

kyā kyā machī haiñ yaaro barsāt kī bahāreñ

baiThe haiñ kitne ḳhush ho ūñche chhuā ke bangle

piite haiñ mai ke pyāle aur dekhte haiñ jañgle

kitne phire haiñ bāhar ḳhūbāñ ko apne sañg le

sab shaad ho rahe haiñ umda ġharīb kañgle

kyā kyā machī haiñ yaaro barsāt kī bahāreñ

kitnoñ ko mahloñ andar hai aish kā nazārā

yā sā.ebān suthrā yā baañs kā usārā

kartā hai sair koī koThe kā le sahārā

muflis bhī kar rahā hai pole tale guzārā

kyā kyā machī haiñ yaaro barsāt kī bahāreñ

chhat girne kā kisī jā ġhul shor ho rahā hai

dīvār kā bhī dhaḌkā kuchh hosh kho rahā hai

dar dar havelī vaalā har aan ro rahā hai

muflis so jhopḌe meñ dil-shād so rahā hai

kyā kyā machī haiñ yaaro barsāt kī bahāreñ

muddat se ho rahā hai jin kā makāñ purānā

uTh ke hai un ko meñh meñ har aan chhat pe jaanā

koī pukārtā hai Tuk morī khol aanā

koī kahe hai chal bhī kyuuñ ho gayā divānā

kyā kyā machī haiñ yaaro barsāt kī bahāreñ

koī pukārtā hai lo ye makān Tapkā

girtī hai chhat kī miTTī aur sā.ebān Tapkā

chhalnī huī aTārī koThā nidān Tapkā

baaqī thā ik usārā so vo bhī aan Tapkā

kyā kyā machī haiñ yaaro barsāt kī bahāreñ

ūñchā makān jis kā hai pach khanā sivāyā

uupar kā khan Tapak kar jab paanī nīche aayā

us ne to apne ghar meñ hai shor-ġhul machāyā

muflis pukārte haiñ jaane hamārā

kyā kyā machī haiñ yaaro barsāt kī bahāreñ

sabzoñ pe biir bhūTī Tīloñ upar dhatūrē

pissū se machchharoñ se ro.e koī basore

bichchhū kisī ko kaaTe kiiḌā kisī ko ghūre

āñgan meñ kansalā.ī konoñ meñ khankhajūre

kyā kyā machī haiñ yaaro barsāt kī bahāreñ

phuñsī kisī ke tan meñ sar par kisī ke phoḌe

chhātī ye garmī daane aur piiTh meñ daroḌe

khā pūriyāñ kisī ko haiñ lag rahe maroḌe

aate haiñ dast jaise dauḌeñ irāqī ghoḌe

kyā kyā machī haiñ yaaro barsāt kī bahāreñ

patlī jahāñ kisī ne daal aur kaḌhī pakā.ī

makkhī ne vohīñ bolī aa uuñT kī bulā.ī

koī pukārtā hai kyuuñ ḳhair to hai bhaa.ī

aise jo khāñste ho kyā kaalī mirch khaa.ī

kyā kyā machī haiñ yaaro barsāt kī bahāreñ

jis gul-badan ke tan meñ poshāk sausanī hai

so vo parī to ḳhāsī kālī-ghaTā banī hai

aur jis pe surḳh joḌā yā uudī oḌhnī hai

us par to sab ghulāvaT barsāt kī chhanī hai

kyā kyā machī haiñ yaaro barsāt kī bahāreñ

badanoñ meñ khab rahe haiñ ḳhūboñ ke laal joḌe

jhamkeñ dikhā rahe haiñ pariyoñ ke laal joḌe

lahreñ banā rahe haiñ laḌkoñ ke laal joḌe

āñkhoñ meñ chubh rahe haiñ pyāroñ ke laal joḌe

kyā kyā machī haiñ yaaro barsāt kī bahāreñ

aur jis sanam ke tan meñ joḌā hai zāfrānī

gulnār yā gulābī yā zard surḳh dhānī

kuchh husn kī chaḌhā.ī aur kuchh na.ī javānī

jhūloñ meñ jhūlte haiñ uupar paḌe hai paanī

kyā kyā machī haiñ yaaro barsāt kī bahāreñ

koī to jhūlne meñ jhūle kī Dor chhoḌe

yā sāthiyoñ meñ apne paañv se paañv joḌe

bādal khaḌe haiñ sar par barse haiñ thoḌe thoḌe

būñdoñ meñ bhīgte haiñ laal aur gulābī joḌe

kyā kyā machī haiñ yaaro barsāt kī bahāreñ

kitnoñ ko ho rahī hai us aish kī nishānī

sote haiñ saath jis ke kahtī hai vo siyānī

is vaqt tum na jaao ai mere yār-e-jānī

dekho to kis maze se barse hai aaj paanī

kyā kyā machī haiñ yaaro barsāt kī bahāreñ

kitne sharāb pī kar ho mast chhak rahe haiñ

mai kī gulābī aage pyāle chhalak rahe haiñ

hotā hai naach ghar ghar ghuñghrū jhanak rahe haiñ

paḌtā hai meñh jhaḌā-jhaḌ table khaḌak rahe haiñ

kyā kyā machī haiñ yaaro barsāt kī bahāreñ

haiñ jin ke tan mulā.em maide kī jaise loī

vo is havā meñ ḳhāsī oḌhe phire haiñ loī

aur jin kī muflisī ne sharm-o-hayā hai khoī

hai un ke sar pe sar kī yā boriye kī khoī

kyā kyā machī haiñ yaaro barsāt kī bahāreñ

kitne phire haiñ oḌhe paanī meñ surḳh paTTū

jo dekh surḳh badlī hotī hai un pe laTTū

kitnoñ kī gaaḌī rath haiñ kitnoñ ke ghoḌe TaTTū

jis paas kuchh nahīñ hai vo ham sā hai nikhaTTū

kyā kyā machī haiñ yaaro barsāt kī bahāreñ

jo is havā meñ yaaro daulat meñ kuchh baḌhe haiñ

hai un ke sar pe chhatrī hāthī pe vo chaḌhe haiñ

ham se ġharīb ġhorabā kīchaḌ meñ gir paḌe haiñ

hāthoñ meñ jūtiyāñ haiñ aur pā.eñche chaḌhe haiñ

kyā kyā machī haiñ yaaro barsāt kī bahāreñ

hai jin kane muhayyā pakkā pakāyā khānā

un ko palañg pe baiThe jhaḌiyoñ kā ḳhat uḌānā

hai jin ko apne ghar meñ yaañ lon tel laanā

hai sar pe un ke pañkhā yā chhāj hai purānā

kyā kyā machī haiñ yaaro barsāt kī bahāreñ

kitne ḳhushī se baiThe khāte haiñ ḳhush mahal meñ

kitne chale haiñ lene baniye se qarz pal meñ

kāñdhe pe daal aaTā haldī girah ne mal meñ

hāthoñ meñ ghī kī pyālī aur lakḌiyāñ baġhal meñ

kyā kyā machī haiñ yaaro barsāt kī bahāreñ

jo kasbiyāñ javāneñ husnoñ meñ purtiyāñ haiñ

sīnoñ meñ laal añgiyāñ aur laal kurtiyāñ haiñ

nazreñ bhī badliyāñ haiñ dil meñ bhī surtiyāñ haiñ

ik ik nigah meñ kāfir bijlī kī phurtiyāñ haiñ

kyā kyā machī haiñ yaaro barsāt kī bahāreñ

jo naujavāñ haiñ un kī tayyāriyāñ baḌī haiñ

hāthoñ meñ laal chhaḌiyāñ koThoñ pe vo khaḌī haiñ

aur vo jo āshnā se jhagḌī haiñ yā laḌī haiñ

muñh ko chhupā palañg par machlī huī paḌī haiñ

kyā kyā machī haiñ yaaro barsāt kī bahāreñ

koī apne āshnā se kar naaz kā jhapaTTā

kahtī hai hañs ke kāfir chuTkī le yā nihaTTā

tum se to dil hamārā ab ho gayā hai khaTTā

tum aaj bhī na laa.e rañvā mirā dupaTTā

kyā kyā machī haiñ yaaro barsāt kī bahāreñ

kahtī haiñ koī mujh ko joḌā sohā banā do

yā TaaT baafī juutā yā kafsh-e-surḳh lā do

koī kahe hai merī kurtī abhī rañgā do

yā garm se andarse ik sair bhar mañgā do

kyā kyā machī haiñ yaaro barsāt kī bahāreñ

jo un ke mubtalā haiñ sab chiiz lā rahe haiñ

kurtī banā rahe haiñ añgiyā rañgā rahe haiñ

jo jo haiñ un kī bāteñ sab kuchh uThā rahe haiñ

bāheñ gale meñ Daale ishrat manā rahe haiñ

kyā kyā machī haiñ yaaro barsāt kī bahāreñ

kitnoñ ne qaul bāñdhā ma.amūlī de ke paise

kahte haiñ shaad ho kar yuuñ apne āshnā se

barsāt-bhar to mil ke sunte ho jaan pyāre

ahmaq ho jo palañg se ab mūtne ko utre

kyā kyā machī haiñ yaaro barsāt kī bahāreñ

ye sun ke un se hañs hañs kahtī hai shoḳh ranDī

ma.amūlī ab to le kar bandī bhī hai ghamanDī

ham pahneñ laal joḌā tum pahno ḳhāsī bañDī

ḳhandī ho jo tumhārī chhātī kare na ThanDī

kyā kyā machī haiñ yaaro barsāt kī bahāreñ

zardār kī to un meñ hai bichh rahī palañgaḌī

dilbar parī sī baiThī jhamkā.e chūḌī nibagaḌī

muflis kī TuuTī paTTī yā TaaT kī jhalañgaḌī

ranDī milī to kaalī yā kunjī luulī lañgḌī

kyā kyā machī haiñ yaaro barsāt kī bahāreñ

kurtī gulābī jin meñ goTe lage hue haiñ

añgiyāñ ke gard jhūTe goTe Take hue haiñ

kahtī haiñ un se hans hans jo jo kaTe hue haiñ

lā ab to mere tujh par bārah Take hue haiñ

kyā kyā machī haiñ yaaro barsāt kī bahāreñ

jo begamī hai ghar meñ ārām kar rahī hai

pardoñ meñ dostoñ se paiġhām kar rahī hai

chitvan lāvaToñ se sau daam kar rahī hai

chupke hī chupke apnā sab kaam kar rahī hai

kyā kyā machī haiñ yaaro barsāt kī bahāreñ

kahtā hai koī apne mahbūb sīm-bar se

vo is meñh meñ na jaao pyāre hamāre barse

koī kahe hai apne dildār-e-ḳhush-nazar se

hāthoñ se mere jaanī khā le ye do andarse

kyā kyā machī haiñ yaaro barsāt kī bahāreñ

kahtā hai koī pyārī jo kuchh kaho sau lā deñ

zar-dozī TāT-bāfī juutā kaho pahnā deñ

peḌā jalebī laDDū jo khaao so mañgā deñ

chīrā dupaTTa jaama jaisā kaho rañgā deñ

kyā kyā machī haiñ yaaro barsāt kī bahāreñ

jin dilbaroñ ke tan par haiñ garmī daane aale

kahte haiñ un ko āshiq yuuñ pyaar se bulā le

kyā meñh baras rahā hai pyāre zarā nahā le

chhātī nahīñ to pyāre Tuk piiTh hī milā le

kyā kyā machī haiñ yaaro barsāt kī bahāreñ

is rut meñ haiñ jahāñ tak gulzār bhīgte haiñ

shahr-o-dayār kūche bāzār bhīgte haiñ

sahra-o-jhāḌ buuTe kohsār bhīgte haiñ

āshiq nahā rahe haiñ dildār bhīgte haiñ

kyā kyā machī haiñ yaaro barsāt kī bahāreñ

kahtī hai jab vo sun kar ye baat bhiig ahmaq

mārūñgī tere aa kar ik laat bhiig ahmaq

mujh ko bhī zid chaḌhī hai din-rāt bhiig ahmaq

yūñhī to ab ke saarī barsāt bhiig ahmaq

kyā kyā machī haiñ yaaro barsāt kī bahāreñ

zardār kī to sun kar āvāz vo parī-rū

kahtī hai launDiyoñ se jaldī kivāḌ kholo

muflis koī pukāre to is se kahtī hai vo

hargiz koī na bolo ahmaq ko bhīgne do

kyā kyā machī haiñ yaaro barsāt kī bahāreñ

koī yaar se kahe hai ai dil-sitān aao

badlī baḌī uThī hai kahne ko maan aao

kyā meñh baras rahā hai har ik makān aao

rāteñ añdheriyāñ haiñ ai merī jaan aao

kyā kyā machī haiñ yaaro barsāt kī bahāreñ

koī raat ko pukāre pyāre maiñ bhīgtī huuñ

kyā terī ulfatoñ ke maare maiñ bhīgtī huuñ

aa.ī huuñ terī ḳhātir aa re maiñ bhīgtī huuñ

kuchh to taras tū miirā khā re maiñ bhīgtī huuñ

kyā kyā machī haiñ yaaro barsāt kī bahāreñ

koī pukārtī hai dil saḳht bhīgtī huuñ

kāñpe hai merī chhātī yak-laḳht bhīgtī huuñ

kapḌe bhī tar-ba-tar haiñ aur saḳht bhīgtī huuñ

jaldī bulā le mujh ko kambaḳht bhīgtī huuñ

kyā kyā machī haiñ yaaro barsāt kī bahāreñ

shīsha kahīñ gulābī botal jhamak rahī hai

rābīl motiyā kī ḳhushbū mahak rahī hai

chhātī se chhātī lag kar ishrat chhalak rahī hai

paa.e khaTak rahe haiñ paTTī chaTak rahī hai

kyā kyā machī haiñ yaaro barsāt kī bahāreñ

koī pukārtī hai kyā kyā mujhe bhigoyā

koī pukārtī hai kaisā mujhe bhigoyā

nāhaq qarār kar ke jhūTā mujhe bhigoyā

yuuñ duur se bulā kar achchhā mujhe bhigoyā

kyā kyā machī haiñ yaaro barsāt kī bahāreñ

jin dilbaroñ kī ḳhātir bhīge haiñ jin ke joḌe

vo dekh un kī ulfat hote haiñ thoḌe thoḌe

le un ke bhīge kapḌe hāthoñ meñ dhar nichoḌe

chīrā koī suñgāve jaama koī nichoḌe

kyā kyā machī haiñ yaaro barsāt kī bahāreñ

kīchaḌ se ho rahī hai jis jā zamīñ phisalnī

mushkil huī hai vaañ se har ik ko raah chalnī

phislā jo paañv pagḌī mushkil hai phir sambhalnī

jotī girī to vaañ se kyā taab phir niklī

kyā kyā machī haiñ yaaro barsāt kī bahāreñ

kitne to कीचड़ों kī daldal meñ phañs rahe haiñ

kapḌe tamām gandī daldal meñ bas rahe haiñ

kitne uThe haiñ marmar kitne ukas rahe haiñ

vo dukh meñ phañs rahe haiñ aur log hañs rahe haiñ

kyā kyā machī haiñ yaaro barsāt kī bahāreñ

kahtā hai koī gir kar ye ai ḳhudā.e liijo

koī Dagmagā ke har-dam kahtā hai vaa.e liijo

koī haath uThā pukāre mujh ko bhī haa.e liijo

koī shor kar pukāre girne na paa.e liijo

kyā kyā machī haiñ yaaro barsāt kī bahāreñ

gir kar kisī ke kapḌe daldal meñ haiñ mo.attar

phislā koī kisī kā kīchaḌ meñ muñh gayā bhar

ik do nahīñ phisalte kuchh is meñ aan aksar

hote haiñ saikḌoñ ke sar nīche paañv uupar

kyā kyā machī haiñ yaaro barsāt kī bahāreñ

ye rut vo hai ki jis meñ ḳhurd-o-kabīr ḳhush haiñ

adnā ġharīb muflis shāh-o-vazīr ḳhush haiñ

ma.ashūq shād-o-ḳhurram āshiq asiir ḳhush haiñ

jitne haiñ ab jahāñ meñ sab ai 'nazīr' ḳhush haiñ

kyā kyā machī haiñ yaaro barsāt kī bahāreñ

hain is hawa mein kya kya barsat ki bahaaren

sabzon ki lahlahahaT baghat ki bahaaren

bundon ki jhamjhamawaT qatraat ki bahaaren

har baat ke tamashe har ghat ki bahaaren

kya kya machi hain yaro barsat ki bahaaren

baadal hawa ke upar ho mast chha rahe hain

jhaDiyon ki mastiyon se dhumen macha rahe hain

paDte hain pani har ja jal-thal bana rahe hain

gulzar bhigte hain sabze naha rahe hain

kya kya machi hain yaro barsat ki bahaaren

mare hain mauj Dabar dariya daunD rahe hain

mor-o-papihe koyal kya kya rumanD rahe hain

jhaD kar rahi hain jhaDiyan nale umanD rahe hain

barse hai munh jhaDa jhaD baadal ghumanD rahe hain

kya kya machi hain yaro barsat ki bahaaren

jangal sab apne tan par hariyali saj rahe hain

gul phul jhaD-buTe kar apni dhaj rahe hain

bijli chamak rahi hai baadal garaj rahe hain

allah ke naqare naubat ke baj rahe hain

kya kya machi hain yaro barsat ki bahaaren

baadal laga Takoren naubat ki gat lagawen

jhengur jhangar apni surnaiyan bajawen

kar shor mor bagule jhaDiyon ka munh bulawen

pi pi karen papihe meinDak malaren gawen

kya kya machi hain yaro barsat ki bahaaren

har ja bichha raha hai sabza hare bichhaune

qudrat ke bichh rahe hain har ja hare bichhaune

jangalon mein ho rahe hain paida hare bichhaune

bichhwa diye hain haq ne kya kya hare bichhaune

kya kya machi hain yaro barsat ki bahaaren

sabzon ki lahlahahaT kuchh abr ki siyahi

aur chha rahi ghaTaen surKH aur safed kahi

sab bhigte hain ghar ghar le mah-ta-ba-mahi

ye rang kaun range tere siwa ilahi

kya kya machi hain yaro barsat ki bahaaren

kya kya rakhe hain yarab saman teri qudrat

badle hai rang kya kya har aan teri qudrat

sab mast ho rahe pahchan teri qudrat

titar pukarte hain subhan teri qudrat

kya kya machi hain yaro barsat ki bahaaren

koyal ki kuk mein bhi tera hi nam haiga

aur mor ki zaTal mein tera payam haiga

ye rang sau maze ka jo subh-o-sham haiga

ye aur ka nahin hai tera hi kaam haiga

kya kya machi hain yaro barsat ki bahaaren

bolin bae baTeren qumri pukare ku-ku

pi pi kare papiha bagule pukaren tu-tu

kya hudhudon ki haq haq kya faKHaton ki hu-hu

sab raT rahe hain tujh ko kya pankh kya pakheru

kya kya machi hain yaro barsat ki maren

jo mast hon idhar ke kar shor nachte hain

pyare ka nam le kar kya zor nachte hain

baadal hawa se kar kar ghanghor nachte hain

meinDak uchhal rahe hain aur mor nachte hain

kya kya machi hain yaro barsat ki bahaaren

phulon ki sej upar sote hain kitne ban-ban

so hain gulabi joDe phulon ke haar abran

kitnon ke ghar hai khana sona lage hai aangan

kone mein paD rahi hain sar munh lapeT sogan

kya kya machi hain yaro barsat ki bahaaren

jo KHush hain wo KHushi mein kaTe hain raat sari

jo gham mein hain unhon par guzre hai raat bhaari

sinon se lag rahi hain jo hain piya ki pyari

chhati phaTe hai un ki jo hain birah ki mari

kya kya machi hain yaro barsat ki bahaaren

jo wasl mein hain un ke juDe mahak rahe hain

jhulon mein jhulte hain gahne jhamak rahe hain

jo dukh mein hain so un ke sine phaDak rahe hain

aahen nikal rahi hain aansu Tapak rahe hain

kya kya machi hain yaro barsat ki bahaaren

ab birhanon ke upar hai saKHt be-qarari

har bund marti hai sine upar kaTari

badli ki dekh surat kahti hain bari bari

hai hai na li piya ne ab ke bhi sudh hamari

kya kya machi hain yaro barsat ki bahaaren

jab koyal apni un ko aawaz hai sunati

sunte hi gham ko mare chhati hai umnDi aati

pi pi ki dhun ko sun kar be-kal hain kahti jati

mat bol ai papihe phaTti hai meri chhati

kya kya machi hain yaro barsat ki bahaaren

hai jin ki sej suni aur KHali chaarpai

ro ro unhon ne har-dam ye baat hai sunai

pardesi ne hamari ab ke bhi sudh bhulai

ab ke bhi chhawni ja pardes mein hai chhai

kya kya machi hain yaro barsat ki bahaaren

kitnon ne apni gham se ab hai ye gat banai

maile kuchaile kapDe aankhen bhi DabDabai

ne ghar mein jhula Dala ne oDhni rangai

phuTa paDa hai chulha TuTi paDi kaDhai

kya kya machi hain yaro barsat ki bahaaren

gati hai git koi jhule pe kar ke phera

maro ji aaj kijiye yan rain ka basera

hai KHush kisi ko aa kar hai dard-o-gham ne ghera

munh zard baal bikhre aur aankhon mein andhera

kya kya machi hain yaro barsat ki bahaaren

aur jin ko ab muhayya husnon ki Dheriyan hain

surKH aur sunahre kapDe ishrat ki gheriyan hain

mahbub dilbaron ki zulfen bikheriyan hain

jugnu chamak rahe hain raaten andheriyan hain

kya kya machi hain yaro barsat ki bahaaren

kitne to bhang pi pi kapDe bhigo rahe hain

bahen gulon mein Dale jhulon mein so rahe hain

kitne birah ke mare sudh apni kho rahe hain

jhule ki dekh surat har aan ro rahe hain

kya kya machi hain yaro barsat ki bahaaren

baiThe hain kitne KHush ho unche chhua ke bangle

pite hain mai ke pyale aur dekhte hain jangle

kitne phire hain bahar KHuban ko apne sang le

sab shad ho rahe hain umda gharib kangle

kya kya machi hain yaro barsat ki bahaaren

kitnon ko mahlon andar hai aish ka nazara

ya saeban suthra ya bans ka usara

karta hai sair koi koThe ka le sahaara

muflis bhi kar raha hai pole tale guzara

kya kya machi hain yaro barsat ki bahaaren

chhat girne ka kisi ja ghul shor ho raha hai

diwar ka bhi dhaDka kuchh hosh kho raha hai

dar dar haweli wala har aan ro raha hai

muflis so jhopDe mein dil-shad so raha hai

kya kya machi hain yaro barsat ki bahaaren

muddat se ho raha hai jin ka makan purana

uTh ke hai un ko meinh mein har aan chhat pe jaana

koi pukarta hai Tuk mori khol aana

koi kahe hai chal bhi kyun ho gaya diwana

kya kya machi hain yaro barsat ki bahaaren

koi pukarta hai lo ye makan Tapka

girti hai chhat ki miTTi aur saeban Tapka

chhalni hui aTari koTha nidan Tapka

baqi tha ek usara so wo bhi aan Tapka

kya kya machi hain yaro barsat ki bahaaren

uncha makan jis ka hai pach khana siwaya

upar ka khan Tapak kar jab pani niche aaya

us ne to apne ghar mein hai shor-ghul machaya

muflis pukarte hain jaane hamara

kya kya machi hain yaro barsat ki bahaaren

sabzon pe bir bhuTi Tilon upar dhaturee

pissu se machchharon se roe koi basore

bichchhu kisi ko kaTe kiDa kisi ko ghure

aangan mein kansalai konon mein khankhajure

kya kya machi hain yaro barsat ki bahaaren

phunsi kisi ke tan mein sar par kisi ke phoDe

chhati ye garmi dane aur piTh mein daroDe

kha puriyan kisi ko hain lag rahe maroDe

aate hain dast jaise dauDen iraqi ghoDe

kya kya machi hain yaro barsat ki bahaaren

patli jahan kisi ne dal aur kaDhi pakai

makkhi ne wohin boli aa unT ki bulai

koi pukarta hai kyun KHair to hai bhai

aise jo khanste ho kya kali mirch khai

kya kya machi hain yaro barsat ki bahaaren

jis gul-badan ke tan mein poshak sausani hai

so wo pari to KHasi kali-ghaTa bani hai

aur jis pe surKH joDa ya udi oDhni hai

us par to sab ghulawaT barsat ki chhani hai

kya kya machi hain yaro barsat ki bahaaren

badanon mein khab rahe hain KHubon ke lal joDe

jhamken dikha rahe hain pariyon ke lal joDe

lahren bana rahe hain laDkon ke lal joDe

aankhon mein chubh rahe hain pyaron ke lal joDe

kya kya machi hain yaro barsat ki bahaaren

aur jis sanam ke tan mein joDa hai zafrani

gulnar ya gulabi ya zard surKH dhani

kuchh husn ki chaDhai aur kuchh nai jawani

jhulon mein jhulte hain upar paDe hai pani

kya kya machi hain yaro barsat ki bahaaren

koi to jhulne mein jhule ki Dor chhoDe

ya sathiyon mein apne panw se panw joDe

baadal khaDe hain sar par barse hain thoDe thoDe

bundon mein bhigte hain lal aur gulabi joDe

kya kya machi hain yaro barsat ki bahaaren

kitnon ko ho rahi hai us aish ki nishani

sote hain sath jis ke kahti hai wo siyani

is waqt tum na jao ai mere yar-e-jaani

dekho to kis maze se barse hai aaj pani

kya kya machi hain yaro barsat ki bahaaren

kitne sharab pi kar ho mast chhak rahe hain

mai ki gulabi aage pyale chhalak rahe hain

hota hai nach ghar ghar ghunghru jhanak rahe hain

paDta hai meinh jhaDa-jhaD table khaDak rahe hain

kya kya machi hain yaro barsat ki bahaaren

hain jin ke tan mulaem maide ki jaise loi

wo is hawa mein KHasi oDhe phire hain loi

aur jin ki muflisi ne sharm-o-haya hai khoi

hai un ke sar pe sar ki ya boriye ki khoi

kya kya machi hain yaro barsat ki bahaaren

kitne phire hain oDhe pani mein surKH paTTu

jo dekh surKH badli hoti hai un pe laTTu

kitnon ki gaDi rath hain kitnon ke ghoDe TaTTu

jis pas kuchh nahin hai wo hum sa hai nikhaTTu

kya kya machi hain yaro barsat ki bahaaren

jo is hawa mein yaro daulat mein kuchh baDhe hain

hai un ke sar pe chhatri hathi pe wo chaDhe hain

hum se gharib ghoraba kichaD mein gir paDe hain

hathon mein jutiyan hain aur paenche chaDhe hain

kya kya machi hain yaro barsat ki bahaaren

hai jin kane muhayya pakka pakaya khana

un ko palang pe baiThe jhaDiyon ka KHat uDana

hai jin ko apne ghar mein yan lon tel lana

hai sar pe un ke pankha ya chhaj hai purana

kya kya machi hain yaro barsat ki bahaaren

kitne KHushi se baiThe khate hain KHush mahal mein

kitne chale hain lene baniye se qarz pal mein

kandhe pe dal aaTa haldi girah ne mal mein

hathon mein ghi ki pyali aur lakDiyan baghal mein

kya kya machi hain yaro barsat ki bahaaren

jo kasbiyan jawanen husnon mein purtiyan hain

sinon mein lal angiyan aur lal kurtiyan hain

nazren bhi badliyan hain dil mein bhi surtiyan hain

ek ek nigah mein kafir bijli ki phurtiyan hain

kya kya machi hain yaro barsat ki bahaaren

jo naujawan hain un ki tayyariyan baDi hain

hathon mein lal chhaDiyan koThon pe wo khaDi hain

aur wo jo aashna se jhagDi hain ya laDi hain

munh ko chhupa palang par machli hui paDi hain

kya kya machi hain yaro barsat ki bahaaren

koi apne aashna se kar naz ka jhapaTTa

kahti hai hans ke kafir chuTki le ya nihaTTa

tum se to dil hamara ab ho gaya hai khaTTa

tum aaj bhi na lae ranwa mera dupaTTa

kya kya machi hain yaro barsat ki bahaaren

kahti hain koi mujh ko joDa soha bana do

ya TaT bafi juta ya kafsh-e-surKH la do

koi kahe hai meri kurti abhi ranga do

ya garm se andarse ek sair bhar manga do

kya kya machi hain yaro barsat ki bahaaren

jo un ke mubtala hain sab chiz la rahe hain

kurti bana rahe hain angiya ranga rahe hain

jo jo hain un ki baaten sab kuchh uTha rahe hain

bahen gale mein Dale ishrat mana rahe hain

kya kya machi hain yaro barsat ki bahaaren

kitnon ne qaul bandha mamuli de ke paise

kahte hain shad ho kar yun apne aashna se

barsat-bhar to mil ke sunte ho jaan pyare

ahmaq ho jo palang se ab mutne ko utre

kya kya machi hain yaro barsat ki bahaaren

ye sun ke un se hans hans kahti hai shoKH ranDi

mamuli ab to le kar bandi bhi hai ghamanDi

hum pahnen lal joDa tum pahno KHasi banDi

KHandi ho jo tumhaari chhati kare na ThanDi

kya kya machi hain yaro barsat ki bahaaren

zardar ki to un mein hai bichh rahi palangaDi

dilbar pari si baiThi jhamkae chuDi nibagaDi

muflis ki TuTi paTTi ya TaT ki jhalangaDi

ranDi mili to kali ya kunji luli langDi

kya kya machi hain yaro barsat ki bahaaren

kurti gulabi jin mein goTe lage hue hain

angiyan ke gard jhuTe goTe Take hue hain

kahti hain un se hans hans jo jo kaTe hue hain

la ab to mere tujh par barah Take hue hain

kya kya machi hain yaro barsat ki bahaaren

jo begami hai ghar mein aaram kar rahi hai

pardon mein doston se paigham kar rahi hai

chitwan lawaTon se sau dam kar rahi hai

chupke hi chupke apna sab kaam kar rahi hai

kya kya machi hain yaro barsat ki bahaaren

kahta hai koi apne mahbub sim-bar se

wo is meinh mein na jao pyare hamare barse

koi kahe hai apne dildar-e-KHush-nazar se

hathon se mere jaani kha le ye do andarse

kya kya machi hain yaro barsat ki bahaaren

kahta hai koi pyari jo kuchh kaho sau la den

zar-dozi TaT-bafi juta kaho pahna den

peDa jalebi laDDu jo khao so manga den

chira dupaTTa jama jaisa kaho ranga den

kya kya machi hain yaro barsat ki bahaaren

jin dilbaron ke tan par hain garmi dane aale

kahte hain un ko aashiq yun pyar se bula le

kya meinh baras raha hai pyare zara naha le

chhati nahin to pyare Tuk piTh hi mila le

kya kya machi hain yaro barsat ki bahaaren

is rut mein hain jahan tak gulzar bhigte hain

shahr-o-dayar kuche bazar bhigte hain

sahra-o-jhaD buTe kohsar bhigte hain

aashiq naha rahe hain dildar bhigte hain

kya kya machi hain yaro barsat ki bahaaren

kahti hai jab wo sun kar ye baat bhig ahmaq

marungi tere aa kar ek lat bhig ahmaq

mujh ko bhi zid chaDhi hai din-raat bhig ahmaq

yunhi to ab ke sari barsat bhig ahmaq

kya kya machi hain yaro barsat ki bahaaren

zardar ki to sun kar aawaz wo pari-ru

kahti hai launDiyon se jaldi kiwaD kholo

muflis koi pukare to is se kahti hai wo

hargiz koi na bolo ahmaq ko bhigne do

kya kya machi hain yaro barsat ki bahaaren

koi yar se kahe hai ai dil-sitan aao

badli baDi uThi hai kahne ko man aao

kya meinh baras raha hai har ek makan aao

raaten andheriyan hain ai meri jaan aao

kya kya machi hain yaro barsat ki bahaaren

koi raat ko pukare pyare main bhigti hun

kya teri ulfaton ke mare main bhigti hun

aai hun teri KHatir aa re main bhigti hun

kuchh to taras tu mera kha re main bhigti hun

kya kya machi hain yaro barsat ki bahaaren

koi pukarti hai dil saKHt bhigti hun

kanpe hai meri chhati yak-laKHt bhigti hun

kapDe bhi tar-ba-tar hain aur saKHt bhigti hun

jaldi bula le mujh ko kambaKHt bhigti hun

kya kya machi hain yaro barsat ki bahaaren

shisha kahin gulabi botal jhamak rahi hai

rabil motiya ki KHushbu mahak rahi hai

chhati se chhati lag kar ishrat chhalak rahi hai

pae khaTak rahe hain paTTi chaTak rahi hai

kya kya machi hain yaro barsat ki bahaaren

koi pukarti hai kya kya mujhe bhigoya

koi pukarti hai kaisa mujhe bhigoya

nahaq qarar kar ke jhuTa mujhe bhigoya

yun dur se bula kar achchha mujhe bhigoya

kya kya machi hain yaro barsat ki bahaaren

jin dilbaron ki KHatir bhige hain jin ke joDe

wo dekh un ki ulfat hote hain thoDe thoDe

le un ke bhige kapDe hathon mein dhar nichoDe

chira koi sungawe jama koi nichoDe

kya kya machi hain yaro barsat ki bahaaren

kichaD se ho rahi hai jis ja zamin phisalni

mushkil hui hai wan se har ek ko rah chalni

phisla jo panw pagDi mushkil hai phir sambhalni

joti giri to wan se kya tab phir nikli

kya kya machi hain yaro barsat ki bahaaren

kitne to कीचड़ों ki daldal mein phans rahe hain

kapDe tamam gandi daldal mein bas rahe hain

kitne uThe hain marmar kitne ukas rahe hain

wo dukh mein phans rahe hain aur log hans rahe hain

kya kya machi hain yaro barsat ki bahaaren

kahta hai koi gir kar ye ai KHudae lijo

koi Dagmaga ke har-dam kahta hai wae lijo

koi hath uTha pukare mujh ko bhi hae lijo

koi shor kar pukare girne na pae lijo

kya kya machi hain yaro barsat ki bahaaren

gir kar kisi ke kapDe daldal mein hain moattar

phisla koi kisi ka kichaD mein munh gaya bhar

ek do nahin phisalte kuchh is mein aan aksar

hote hain saikDon ke sar niche panw upar

kya kya machi hain yaro barsat ki bahaaren

ye rut wo hai ki jis mein KHurd-o-kabir KHush hain

adna gharib muflis shah-o-wazir KHush hain

mashuq shad-o-KHurram aashiq asir KHush hain

jitne hain ab jahan mein sab ai 'nazir' KHush hain

kya kya machi hain yaro barsat ki bahaaren