barsat ki ek raat

ye barsāt ye mausam-e-shādmānī

ḳhas-o-ḳhār par phaT paḌī hai javānī

bhaḌaktā hai rah rah ke soz-e-mohabbat

jhamā-jham barastā hai pur-shor paanī

fazā jhūmtī hai ghaTā jhūmtī hai

daraḳhtoñ ko zau barq kī chūmtī hai

thirakte hue abr kā jazb tauba

ki dāman uThā.e zamīñ ghūmtī hai

kaḌaktī hai bijlī chamaktī haiñ būñdeñ

lapaktā hai kauñdā damaktī haiñ būñdeñ

rag-e-jāñ pe rah rah ke lagtī haiñ choTeñ

chhamā-chham ḳhalā meñ khanaktī haiñ būñdeñ

falak gā rahā hai zamīñ gā rahī hai

kaleje meñ har lai chubhī jā rahī hai

mujhe pā ke is mast shab meñ akelā

ye rañgīñ ghaTā tiir barsā rahī hai

chamaktā hai bujhtā hai tharrā rahā hai

bhaTakne kī jugnū sazā pā rahā hai

abhī zehn meñ thā ye raushan taḳhayyul

fazā meñ jo uḌtā chalā jā rahā hai

lachak kar sambhalte haiñ jab abr-pāre

baraste haiñ dāman se dum-dār taare

machaltī hai rah rah ke bāloñ meñ bijlī

gulābī hue jā rahe haiñ kināre

fazā jhuum kar rañg barsā rahī hai

har ik saañs sho.ala banī jā rahī hai

kabhī is tarah yaad aatī nahīñ thī

vo jis tarah is vaqt yaad aa rahī hai

bhalā lutf kyā manzar-e-pur-asar de

ki ashkoñ ne āñkhoñ pe Daale haiñ parde

kahīñ aur jā kar baras mast bādal

ḳhudā terā dāman javāhir se bhar de

ye barsat ye mausam-e-shadmani

KHas-o-KHar par phaT paDi hai jawani

bhaDakta hai rah rah ke soz-e-mohabbat

jhama-jham barasta hai pur-shor pani

faza jhumti hai ghaTa jhumti hai

daraKHton ko zau barq ki chumti hai

thirakte hue abr ka jazb tauba

ki daman uThae zamin ghumti hai

kaDakti hai bijli chamakti hain bunden

lapakta hai kaunda damakti hain bunden

rag-e-jaan pe rah rah ke lagti hain choTen

chhama-chham KHala mein khanakti hain bunden

falak ga raha hai zamin ga rahi hai

kaleje mein har lai chubhi ja rahi hai

mujhe pa ke is mast shab mein akela

ye rangin ghaTa tir barsa rahi hai

chamakta hai bujhta hai tharra raha hai

bhaTakne ki jugnu saza pa raha hai

abhi zehn mein tha ye raushan taKHayyul

faza mein jo uDta chala ja raha hai

lachak kar sambhalte hain jab abr-pare

baraste hain daman se dum-dar tare

machalti hai rah rah ke baalon mein bijli

gulabi hue ja rahe hain kinare

faza jhum kar rang barsa rahi hai

har ek sans shoala bani ja rahi hai

kabhi is tarah yaad aati nahin thi

wo jis tarah is waqt yaad aa rahi hai

bhala lutf kya manzar-e-pur-asar de

ki ashkon ne aankhon pe Dale hain parde

kahin aur ja kar baras mast baadal

KHuda tera daman jawahir se bhar de