basanti tarana

lo phir basant aa.ī

phūloñ pe rañg laa.ī

chalo be-darañg

lab-e-āb-e-gañg

baje jal-tarañg

man par umañg chhā.ī

phūloñ pe rañg laa.ī

lo phir basant aa.ī

aafat ga.ī ḳhizāñ kī

qismat phirī jahāñ kī

chale mai-gusār

sū-e-lāla-zār

ma-e-parda-dār

shīshe ke dar se jhāñkī

qismat phirī jahāñ kī

aafat ga.ī ḳhizāñ kī

khetoñ kā har charinda

bāġhoñ kā har parinda

koī garm-ḳhez

koī naġhma-rez

subuk aur tez

phir ho gayā hai zinda

bāġhoñ kā har parinda

khetoñ kā har charinda

dhartī ke bel-būTe

andāz-e-nau se phūTe

huā baḳht sabz

milā raḳht sabz

haiñ daraḳht sabz

ban ban ke sabz nikle

andāz-e-nau se phūTe

dhartī ke bel-būTe

phūlī huī hai sarsoñ

bhūlī huī hai sarsoñ

nahīñ kuchh bhī yaad

yūñhī bā-murād

yūñhī shaad shaad

goyā rahegī barsoñ

bhūlī huī hai sarsoñ

phūlī huī hai sarsoñ

laḌkoñ kī jañg dekho

Dor aur patañg dekho

koī maar khaa.e

koī khilkhilā.e

koī muñh chiḌhā.e

tiflī ke rañg dekho

Dor aur patañg dekho

laḌkoñ kī jañg dekho

hai ishq bhī junūñ bhī

mastī bhī josh-e-ḳhūñ bhī

kahīñ dil meñ dard

kahīñ āh-e-sard

kahīñ rañg-e-zard

hai yuuñ bhī aur yuuñ bhī

mastī bhī josh-e-ḳhūñ bhī

hai ishq bhī junūñ bhī

ik nāznīñ ne pahne

phūloñ ke zard gahne

hai magar udaas

nahīñ pī ke paas

ġham-o-rañj-o-yās

dil ko paḌe haiñ sahne

ik nāznīñ ne pahne

phūloñ ke zard gahne

lo phir basant aai

phulon pe rang lai

chalo be-darang

lab-e-ab-e-gang

baje jal-tarang

man par umang chhai

phulon pe rang lai

lo phir basant aai

aafat gai KHizan ki

qismat phiri jahan ki

chale mai-gusar

su-e-lala-zar

ma-e-parda-dar

shishe ke dar se jhanki

qismat phiri jahan ki

aafat gai KHizan ki

kheton ka har charinda

baghon ka har parinda

koi garm-KHez

koi naghma-rez

subuk aur tez

phir ho gaya hai zinda

baghon ka har parinda

kheton ka har charinda

dharti ke bel-buTe

andaz-e-nau se phuTe

hua baKHt sabz

mila raKHt sabz

hain daraKHt sabz

ban ban ke sabz nikle

andaz-e-nau se phuTe

dharti ke bel-buTe

phuli hui hai sarson

bhuli hui hai sarson

nahin kuchh bhi yaad

yunhi ba-murad

yunhi shad shad

goya rahegi barson

bhuli hui hai sarson

phuli hui hai sarson

laDkon ki jang dekho

Dor aur patang dekho

koi mar khae

koi khilkhilae

koi munh chiDhae

tifli ke rang dekho

Dor aur patang dekho

laDkon ki jang dekho

hai ishq bhi junun bhi

masti bhi josh-e-KHun bhi

kahin dil mein dard

kahin aah-e-sard

kahin rang-e-zard

hai yun bhi aur yun bhi

masti bhi josh-e-KHun bhi

hai ishq bhi junun bhi

ek naznin ne pahne

phulon ke zard gahne

hai magar udas

nahin pi ke pas

gham-o-ranj-o-yas

dil ko paDe hain sahne

ek naznin ne pahne

phulon ke zard gahne