bayaban-e-basra

to phir abbā nahīñ aa.e

faqīr aayā na muTThī bhar anaaj aayā

badal detā hai ruḳh bātoñ kā jaise be-ḳhayālī meñ

vo jhīleñ darmiyāñ aatī haiñ

jo jale chamakte abr-pāroñ narkuloñ nīlūfaroñ se jā-ba-jā ābād

kahīñ nīlam kahīñ lāl-o-zamurrad se jo maalā maal

kisī rut meñ dahaktī dhuul kī jāgīr sūkhā taal

magar abbā jo kahte the

vahāñ nahreñ ravānī meñ haiñ bārah maas

chauḌe paaT pakke ghaaT

tanāvar peḌ jin ke nīche kharī chārpā.ī

kash pe kash huqqe ke

yuuñ apne vatan ke ThaaT

vatan un kā hamāre hī vatan kā ek qarya thā

to phir abbā nahīñ aa.e

kahānī-kār kī uljhan

ki sunñe vaalā sun kar an-sunī kartā hai

jaise saarā naqsha dekhā bhālā ho us kā

ise bas vaqfa vaqfa se latīfoñ kī talab

phir un ko gahre-pan se pī jaanā

use aadat ki thāme haath un kā

jo kisī Dhalvān se nīche utarte haiñ to Darte haiñ

magar ik iztirārī sī zaqand apnī

azal se jo malāmat cash kam āzār mehnat-kash

achānak darmiyāñ haa.il

vo ranjish ko bhulā dene meñ dariyā dil

magar is baat kā abbā jo kahte the mirā beTā sipāhī hai

nahīñ qaa.il

usī kī ham-navā haiñ vo guzargāheñ

gaḌhoñ Tīloñ chaTānoñ se ibārat

jin se ham aksar guzarte haiñ

havā.eñ is ko rotī haiñ

to aañsū duur

tārā-manDaloñ meñ jā bikharte haiñ

to phir abba nahin aae

faqir aaya na muTThi bhar anaj aaya

badal deta hai ruKH baaton ka jaise be-KHayali mein

wo jhilen darmiyan aati hain

jo jale chamakte abr-paron narkulon nilufaron se ja-ba-ja aabaad

kahin nilam kahin lal-o-zamurrad se jo mala mal

kisi rut mein dahakti dhul ki jagir sukha tal

magar abba jo kahte the

wahan nahren rawani mein hain barah mas

chauDe paT pakke ghaT

tanawar peD jin ke niche khari chaarpai

kash pe kash huqqe ke

yun apne watan ke ThaT

watan un ka hamare hi watan ka ek qarya tha

to phir abba nahin aae

kahani-kar ki uljhan

ki sunne wala sun kar an-suni karta hai

jaise sara naqsha dekha bhaala ho us ka

ise bas waqfa waqfa se latifon ki talab

phir un ko gahre-pan se pi jaana

use aadat ki thame hath un ka

jo kisi Dhalwan se niche utarte hain to Darte hain

magar ek iztirari si zaqand apni

azal se jo malamat cash kam aazar mehnat-kash

achanak darmiyan hail

wo ranjish ko bhula dene mein dariya dil

magar is baat ka abba jo kahte the mera beTa sipahi hai

nahin qail

usi ki ham-nawa hain wo guzargahen

gaDhon Tilon chaTanon se ibarat

jin se hum aksar guzarte hain

hawaen is ko roti hain

to aansu dur

tara-manDalon mein ja bikharte hain