be-anjam

suno

is raat kī dhaḌkan meñ

kin muñh-zor qadmoñ kī dhamak hai

ye dil kis jabr se sahmā huā hai

zamānoñ se zamānoñ tak bichhī is raat meñ

ham haath āñkhoñ par lapeTe

kyoñ musalsal chal rahe haiñ

zamīñ apne savā neze pe auñdhe muñh girī hai

hamārā har qadam kitne nasheboñ meñ luḌhaktā hai

ye kaisī be-abad sī hook hai

jo raat ke pas-manzaroñ meñ gūñjtī hai

koī ghuT-ghuT ke jaise bain kartā ho

zamīñ kī larzisheñ ab saañs kī gardish kā hissa haiñ

darūn-e-zāt andeshe dhaḌakte haiñ

na-jāne us ghaḌī kitnī hī āhan-posh sāñseñ

jal bujhī hoñgī

kisī ke saath juḌne kī tamannā meñ

hamesha se kahīñ baḌh ke adhūre ho ga.e hoñge

kabhī tum ne ḳhabar-nāme meñ

lambī mez ke chāroñ taraf baiThe ḳhudā dekhe

kabhī un kī nigāhoñ meñ jamī begāngī dekhī

unheñ āsūdgī ye hai

ki un ke faisloñ se

jin gharoñ meñ maut utregī

vo un ke ghar nahīñ hoñge

tumheñ mā'lūm hai ye sard āñkheñ to hamāre maqbare haiñ

ham in qabroñ meñ 'umreñ bhog dete haiñ

magar ik pal bhī zinda rah nahīñ paate

udhar ye mez ke chāroñ taraf baiThe faqat ye sochte haiñ

ki qabreñ aur gahrī kis tarah khodeñ

jo zarroñ meñ bachī kuchh zindagī

baaqī gharoñ meñ reñgtī hai

use bhī chhīn kar ye kis tarah

apne gharoñ meñ qaid kar Dāleñ

ye sūraj bāñdh sakte haiñ to sab kuchh bāñdh sakte haiñ

hamārī raushnī sub.heñ havā sab in ke qaidī haiñ

savere se tahī ye raat hī āzād phirtī hai

hameñ kab tak nasheboñ meñ luḌhaknā aur qabroñ meñ panapnā hai

chalo ik baar hī chīḳheñ

ki is pur-haul sannāTe meñ koī guuñj to ubhre

ye mumkin hai hamārī chīḳh kī āvāz

is dīvār kī parlī taraf jakḌe hue sūraj ko chhū jaa.e

magar ye kaise mumkin hai

suno

is raat ki dhaDkan mein

kin munh-zor qadmon ki dhamak hai

ye dil kis jabr se sahma hua hai

zamanon se zamanon tak bichhi is raat mein

hum hath aankhon par lapeTe

kyon musalsal chal rahe hain

zamin apne sawa neze pe aundhe munh giri hai

hamara har qadam kitne nashebon mein luDhakta hai

ye kaisi be-abad si hook hai

jo raat ke pas-manzaron mein gunjti hai

koi ghuT-ghuT ke jaise bain karta ho

zamin ki larzishen ab sans ki gardish ka hissa hain

darun-e-zat andeshe dhaDakte hain

na-jaane us ghaDi kitni hi aahan-posh sansen

jal bujhi hongi

kisi ke sath juDne ki tamanna mein

hamesha se kahin baDh ke adhure ho gae honge

kabhi tum ne KHabar-name mein

lambi mez ke chaaron taraf baiThe KHuda dekhe

kabhi un ki nigahon mein jami begangi dekhi

unhen aasudgi ye hai

ki un ke faislon se

jin gharon mein maut utregi

wo un ke ghar nahin honge

tumhein ma'lum hai ye sard aankhen to hamare maqbare hain

hum in qabron mein 'umren bhog dete hain

magar ek pal bhi zinda rah nahin pate

udhar ye mez ke chaaron taraf baiThe faqat ye sochte hain

ki qabren aur gahri kis tarah khoden

jo zarron mein bachi kuchh zindagi

baqi gharon mein rengti hai

use bhi chhin kar ye kis tarah

apne gharon mein qaid kar Dalen

ye suraj bandh sakte hain to sab kuchh bandh sakte hain

hamari raushni subhen hawa sab in ke qaidi hain

sawere se tahi ye raat hi aazad phirti hai

hamein kab tak nashebon mein luDhakna aur qabron mein panapna hai

chalo ek bar hi chiKHen

ki is pur-haul sannaTe mein koi gunj to ubhre

ye mumkin hai hamari chiKH ki aawaz

is diwar ki parli taraf jakDe hue suraj ko chhu jae

magar ye kaise mumkin hai