be-nishan hone se pahle

zindagī ik duur tak sañgīt thī ab shor hai

haañ magar is shor ke bikhrāv meñ

be-mahābā saut ke Takrāv meñ

shāyad abhī andoḳhta kuchh zer-o-bam hoñ

aao ham tum

koī zer-o-bam talāsheñ

koī pech-o-ḳham tarāsheñ

aur is tartīb-kārī kī shu.ūrī koshishoñ ko

lā-shu.ūrī naġhmagī kī āḳhirī miTtī huī sī guuñj se añgez kar ke

ek shab

koī ik āhañg de deñ

is se pahle ki ye shor-e-nā-tamām

sūr-e-isrāfīl ke itmām meñ kho jaa.e

hashr uTThe aur qayāmat aa.e

aur ham ko jhoñk de āvāz ke ik munqat'a rishte ke dozaḳh meñ

faisla kar de hamāre darmiyāñ

ik dā.imī ḳhud-nā-shanāsī ke jahannam kā

is se pahle

aao ham tum

is ḳhalīj-e-nā-rasā.ī par

sadā ke pul banā deñ

be-nishāñ hone se pahle

is zamīñ par āḳhirī pahchān kī duniyā basā leñ

zindagi ek dur tak sangit thi ab shor hai

han magar is shor ke bikhraw mein

be-mahaba saut ke Takraw mein

shayad abhi andoKHta kuchh zer-o-bam hon

aao hum tum

koi zer-o-bam talashen

koi pech-o-KHam tarashen

aur is tartib-kari ki shuuri koshishon ko

la-shuuri naghmagi ki aaKHiri miTti hui si gunj se angez kar ke

ek shab

koi ek aahang de den

is se pahle ki ye shor-e-na-tamam

sur-e-israfil ke itmam mein kho jae

hashr uTThe aur qayamat aae

aur hum ko jhonk de aawaz ke ek munqat'a rishte ke dozaKH mein

faisla kar de hamare darmiyan

ek daimi KHud-na-shanasi ke jahannam ka

is se pahle

aao hum tum

is KHalij-e-na-rasai par

sada ke pul bana den

be-nishan hone se pahle

is zamin par aaKHiri pahchan ki duniya basa len