be-tabir

bachpane kī duniyā thī

jis ke dam se dam letī

ḳhauf kī pichhal-pā.ī

ḳhvāb jis kī zad meñ the

sub.h ḳhvāb sunñe par

sab buzurg kah dete

ḳhvāb kī ye bāteñ haiñ

ham se duur bīteñgī

duur se suneñge ham

ab judā sī duniyā hai

an-kahe zamānoñ ke

jiite jāgte lamhe

dhyān se guzarte haiñ

soch meñ utarte haiñ

par vo din nahīñ aa.e

jis meñ jāgtī taqdīr

sub.h vo nahīñ chhūTī

ḳhvāb kī jo de ta.abīr

duur se sunā ham ne

barf meñ khulī koñpal

ġharb meñ machī halchal

hurriyat huqūq afkār

zauq-e-ārzū āsār

zehn kī kamāñ-dārī

rang-nādirā-kārī

ilm us kī tāmīreñ

barq atom aahan se

jism khel sehat tak

irtiqā kī ta.abīreñ

duur sab samundar paar

apne ḳhvāb kaise haiñ

jo nazar nahīñ aate

intishār itnā hai

sau tarah kī ta.abīreñ

bachpane ki duniya thi

jis ke dam se dam leti

KHauf ki pichhal-pai

KHwab jis ki zad mein the

subh KHwab sunne par

sab buzurg kah dete

KHwab ki ye baaten hain

hum se dur bitengi

dur se sunenge hum

ab juda si duniya hai

an-kahe zamanon ke

jite jagte lamhe

dhyan se guzarte hain

soch mein utarte hain

par wo din nahin aae

jis mein jagti taqdir

subh wo nahin chhuTi

KHwab ki jo de tabir

dur se suna hum ne

barf mein khuli konpal

gharb mein machi halchal

hurriyat huquq afkar

zauq-e-arzu aasar

zehn ki kaman-dari

rang-nadira-kari

ilm us ki tamiren

barq atom aahan se

jism khel sehat tak

irtiqa ki tabiren

dur sab samundar par

apne KHwab kaise hain

jo nazar nahin aate

intishaar itna hai

sau tarah ki tabiren