be-wafa kaise banun

ḳhalvat-e-ġham ke darīchoñ pe ye dastak kaisī

ai mirī faḳhr-e-vafā rashk-e-chaman jān-e-hayā

dāman-e-chashm meñ hai nāma-e-ulfat jab se

dil kā har soyā huā zaḳhm mirā jaag uThā

jāñ-sipārī kī adā mujh ko sikhāne vaale

aaj ye hukm ki maiñ pyaar kā charchā na karūñ

ghaT ke rah jā.ūñ pa ruḳhsār tirī yādoñ ke

apnī taḳhayyul kī āñkhoñ se bhī chūmā na karūñ

bhuul jā.ūñ tire hoñToñ ke chhalakte sāġhar

terī āñkhoñ kī mai-e-tāb se tauba kar luuñ

nuur peshānī kā hoñToñ se churānā kaisā

abrūoñ kī jhukī mehrāb meñ aayā na karūñ

ḳhvāhish-e-sāya-e-gesū-e-pareshāñ hī nahīñ

jannat-e-āriz-o-lab kī bhī tamannā na karūñ

apnī tanhā.ī ke sunsān dar-o-bām kabhī

maiñ tire husn-e-tasavvur se sajāyā na karūñ

talḳhiyāñ ziist kī har taur chhupā.ūñ sab se

ḳhushbūeñ yaad kī sāñsoñ meñ basāyā na karūñ

ḳhvāh taḌpe ki dhaḌakne kī adā tak bhūle

dhaḌkaneñ dil kī magar tum ko sunāyā na karūñ

bhuul jā.ūñ maiñ vafādārī-e-arbāb-e-vafā

ḳhud ko patthar kā tarāshā huā insāñ samjhūñ

jis ko ehsās kī jazbāt kī daulat na mile

ḳhud ko aisī hī kisī jins kā haivāñ samjhūñ

tū agar ḳhush hai isī meñ to koī baat nahīñ

jazba-e-shauq ko jaise bhī ho samjhā.ūñgā

terī chāhat terī ulfat ko bhulāne ke liye

ho sakegā to maiñ ab jaañ se guzar jā.ūñgā

bhuul jā.ūñgā ki tum ne kabhī chāhā thā mujhe

bhuul jā.ūñgā ki tum mujh pe fidā rahte the

tum taḌap uThte the halkī sī udāsī pe mirī

mehrbāñ mujh pe sadā ban ke ḳhudā rahte the

TuuT kar chāhnā sīkhā hai tirī āñkhoñ se

bhuul jaane kī adā.eñ bhī sikhā de mujh ko

maiñ mohabbat kā pujārī huuñ vafā kā shaidā

be-vafā kaise banūñ ye to batā de mujh ko

mere ma.asūm se qātil tirā bismil āḳhir

chhoḌ de kūcha-e-qātil to kahāñ jā.egā

jis jagah hoñgī tire husn kī sham.eñ raushan

terā parvāna vahīñ aa.egā jal jā.egā

be-vafā kaise banūñ

KHalwat-e-gham ke darichon pe ye dastak kaisi

ai meri faKHr-e-wafa rashk-e-chaman jaan-e-haya

daman-e-chashm mein hai nama-e-ulfat jab se

dil ka har soya hua zaKHm mera jag uTha

jaan-sipari ki ada mujh ko sikhane wale

aaj ye hukm ki main pyar ka charcha na karun

ghaT ke rah jaun pa ruKHsar teri yaadon ke

apni taKHayyul ki aankhon se bhi chuma na karun

bhul jaun tere honTon ke chhalakte saghar

teri aankhon ki mai-e-tab se tauba kar lun

nur peshani ka honTon se churana kaisa

abruon ki jhuki mehrab mein aaya na karun

KHwahish-e-saya-e-gesu-e-pareshan hi nahin

jannat-e-ariz-o-lab ki bhi tamanna na karun

apni tanhai ke sunsan dar-o-baam kabhi

main tere husn-e-tasawwur se sajaya na karun

talKHiyan zist ki har taur chhupaun sab se

KHushbuen yaad ki sanson mein basaya na karun

KHwah taDpe ki dhaDakne ki ada tak bhule

dhaDkanen dil ki magar tum ko sunaya na karun

bhul jaun main wafadari-e-arbab-e-wafa

KHud ko patthar ka tarasha hua insan samjhun

jis ko ehsas ki jazbaat ki daulat na mile

KHud ko aisi hi kisi jins ka haiwan samjhun

tu agar KHush hai isi mein to koi baat nahin

jazba-e-shauq ko jaise bhi ho samjhaunga

teri chahat teri ulfat ko bhulane ke liye

ho sakega to main ab jaan se guzar jaunga

bhul jaunga ki tum ne kabhi chaha tha mujhe

bhul jaunga ki tum mujh pe fida rahte the

tum taDap uThte the halki si udasi pe meri

mehrban mujh pe sada ban ke KHuda rahte the

TuT kar chahna sikha hai teri aankhon se

bhul jaane ki adaen bhi sikha de mujh ko

main mohabbat ka pujari hun wafa ka shaida

be-wafa kaise banun ye to bata de mujh ko

mere masum se qatil tera bismil aaKHir

chhoD de kucha-e-qatil to kahan jaega

jis jagah hongi tere husn ki shamen raushan

tera parwana wahin aaega jal jaega

be-wafa kaise banun