be-yaqin bastiyan

vo ik musāfir thā jā chukā hai

batā gayā thā ki be-yaqīnoñ kī bastiyoñ meñ kabhī na rahnā

kabhī na rahnā ki un pe itne azaab utreñge jin kī gintī adad se bāhar

vo apne murde tumhāre kāñdhoñ pe rakh ke tum ko judā kareñge

tum un janāzoñ ko qarya qarya liye phiroge

falak bhī jin se nā-āshnā hai jinheñ zamīneñ bhī rad kareñgī

vo kah gayā thā hamesha zillat se duur rahnā

ki bad-nasīboñ kā rizq-e-avval unhīñ zamīnoñ se paidā hotā hai

jin zamīnoñ pe bhūrī giddhoñ kī nochī haDDī ke reze bikhrīñ

tum apnī raa.e ko istaqāmat kī aab denā

jise pahāḌoñ kī ḳhushk sañgīñ bulandiyoñ se ḳhirāj bhejeñ

ġhulām zehnoñ pe aisī lānat kī rasm rakhnā

jo terī nasloñ phir un kī nasloñ phir un kī nasloñ talak bhī jaa.e

tumheñ ḳhabar ho sharīf logoñ kī ūñchī gardan lachak se aise hī be-ḳhabar hai

savād-e-ġhurbat meñ ḳhema-gāhoñ kī jaise gaaḌī hoñ ḳhushk chobeñ

kabhī na shāne jhukā ke chalnā

ki past-qāmat tumhāre qadmoñ se apne qadmoñ ko joḌ deñge

vahī nahūsat tumheñ ḳharāboñ kī pāsbānī atā karegī

sarāb-āñkhoñ ke rāstoñ se tumhāre gurdoñ meñ ret pheñkeñge aur siine ko kaaT deñge

vo kah gayā thā yahī vo illat ke maare vahshī haiñ jin kī apnī zabāñ nahīñ hai

ye jhaag uḌāte haiñ apne jabḌoñ se lajlaje kā to gaḌgaḌāhaT kā shor uThtā hai

aur badbū bikhertā hai

yahī vo bad-baḳht be-hunar aur be-yaqīñ haiñ ki jin kī diyat na ḳhūñ-bahā hai

so in kī qurbat se duur rahnā najāt-e-dil kā sabab banegā

vo ik musāfir thā kah gayā hai

wo ek musafir tha ja chuka hai

bata gaya tha ki be-yaqinon ki bastiyon mein kabhi na rahna

kabhi na rahna ki un pe itne azab utrenge jin ki ginti adad se bahar

wo apne murde tumhaare kandhon pe rakh ke tum ko juda karenge

tum un janazon ko qarya qarya liye phiroge

falak bhi jin se na-ashna hai jinhen zaminen bhi rad karengi

wo kah gaya tha hamesha zillat se dur rahna

ki bad-nasibon ka rizq-e-awwal unhin zaminon se paida hota hai

jin zaminon pe bhuri giddhon ki nochi haDDi ke reze bikhrin

tum apni rae ko istaqamat ki aab dena

jise pahaDon ki KHushk sangin bulandiyon se KHiraj bhejen

ghulam zehnon pe aisi lanat ki rasm rakhna

jo teri naslon phir un ki naslon phir un ki naslon talak bhi jae

tumhein KHabar ho sharif logon ki unchi gardan lachak se aise hi be-KHabar hai

sawad-e-ghurbat mein KHema-gahon ki jaise gaDi hon KHushk choben

kabhi na shane jhuka ke chalna

ki past-qamat tumhaare qadmon se apne qadmon ko joD denge

wahi nahusat tumhein KHarabon ki pasbani ata karegi

sarab-ankhon ke raston se tumhaare gurdon mein ret phenkenge aur sine ko kaT denge

wo kah gaya tha yahi wo illat ke mare wahshi hain jin ki apni zaban nahin hai

ye jhag uDate hain apne jabDon se lajlaje ka to gaDgaDahaT ka shor uThta hai

aur badbu bikherta hai

yahi wo bad-baKHt be-hunar aur be-yaqin hain ki jin ki diyat na KHun-baha hai

so in ki qurbat se dur rahna najat-e-dil ka sabab banega

wo ek musafir tha kah gaya hai