be-zaban urdu

huī jaatī hai nazr-e-shorish-e-āh-o-fuġhāñ urdu

kahe kis se yahāñ apne ġhamoñ kī dāstāñ urdu

ma.āz-allāh hai dām-e-havas meñ qaid barsoñ se

kahāñ se DhūñD ke laa.e ab apnā mehrbāñ urdu

ijāzat lab-kushā.ī kī na haq fariyād karne kā

ḳhud apne hī vatan meñ ho ga.ī hai be-zabāñ urdu

vahī karte haiñ koshish aaj urdu ko miTāne kī

sikhātī hai jinheñ mahfil meñ andāz-e-bayāñ urdu

zamīñ ab tang hotī jā rahī hai is kī urdu par

kabhī ḳhud aap apne meñ thā ye hindostāñ urdu

batā.eñ kyā ki har maqbūliyat ke ba.ad kyuuñ āḳhir

huī hai shar-pasandoñ ke liye bār-e-garāñ urdu

alāmat jang-e-āzādī meñ thī ye sarfaroshī kī

kabhī thī inqilāb-e-vaqt kā na.ara yahāñ urdu

bikhere us ne taare har taraf mehr-o-mohabbat ke

rahī har daur meñ amn-o-amāñ kī kahkashāñ urdu

diyā paiġhām us ne ektā kā bhā.ī-chāre kā

rahī dīvār ban kar nafratoñ ke darmiyāñ urdu

ġhazal ke ruup meñ ab bhī ye duniyā ko lubhātī hai

pahuñchtī hai jahāñ par bāñdh detī hai samāñ urdu

hazāroñ log rahbar roTiyāñ urdu kī khāte haiñ

magar hai kaun jo dekhe ki kyuuñ hai nīm-jāñ urdu

hui jati hai nazr-e-shorish-e-ah-o-fughan urdu

kahe kis se yahan apne ghamon ki dastan urdu

maaz-allah hai dam-e-hawas mein qaid barson se

kahan se DhunD ke lae ab apna mehrban urdu

ijazat lab-kushai ki na haq fariyaad karne ka

KHud apne hi watan mein ho gai hai be-zaban urdu

wahi karte hain koshish aaj urdu ko miTane ki

sikhati hai jinhen mahfil mein andaz-e-bayan urdu

zamin ab tang hoti ja rahi hai is ki urdu par

kabhi KHud aap apne mein tha ye hindostan urdu

bataen kya ki har maqbuliyat ke baad kyun aaKHir

hui hai shar-pasandon ke liye bar-e-garan urdu

alamat jang-e-azadi mein thi ye sarfaroshi ki

kabhi thi inqilab-e-waqt ka nara yahan urdu

bikhere us ne tare har taraf mehr-o-mohabbat ke

rahi har daur mein amn-o-aman ki kahkashan urdu

diya paigham us ne ekta ka bhai-chaare ka

rahi diwar ban kar nafraton ke darmiyan urdu

ghazal ke rup mein ab bhi ye duniya ko lubhati hai

pahunchti hai jahan par bandh deti hai saman urdu

hazaron log rahbar roTiyan urdu ki khate hain

magar hai kaun jo dekhe ki kyun hai nim-jaan urdu