beradaran-e-watan se

mulk kī hālat pe sīnoñ se dhuāñ uThtā nahīñ

sāz-e-dil ḳhāmosh haiñ shor-e-fuġhāñ uThtā nahīñ

kis liye āñkhoñ se tūfān-e-nihāñ uThtā nahīñ

phuul rauñde jā rahe haiñ bāġhbāñ uThtā nahīñ

be-hisī kī intihā hai hosh meñ aate nahīñ

zillatoñ par zillateñ hotī haiñ sharmāte nahīñ

sho.ala-e-ehsās bujhtā hai havā de do use

qaumiyat dam toḌtī hai kuchh davā de do use

mulk miTne ko hai paiġhām-e-baqā de do use

mutma.in baiThe ho dil siine meñ ghabrātā nahīñ

qaum ke dam toḌne par bhī taras aatā nahīñ

saañs le kar is fazā meñ ruuh ghabrātī nahīñ

jauhar-e-ehsās-e-ḳhuddārī ko sharm aatī nahīñ

tum ko nādārī vatan kī ḳhaak taḌpātī nahīñ

ye ġhulāmī kī balā hairat hai khā jaatī nahīñ

zindagī ko dāvat-e-sad-marg denā chāhiye

maut kī āġhosh meñ ārām lenā chāhiye

chhoḌ do nākāmī-e-qismat ke shikve chhoḌ do

kuchh bhī himmat hai to ye tauq-o-salāsil toḌ do

auj kī jānib nigāh-e-sharmagīñ ko moḌ do

rif.at-e-māzī se phir taqdīr-e-fardā joḌ do

sach to ye hai qaum ke bas tum alam-bardār ho

tā-ba-kai ye ḳhvāb-e-ġhaflat so chuke bedār ho

mulk ki haalat pe sinon se dhuan uThta nahin

saz-e-dil KHamosh hain shor-e-fughan uThta nahin

kis liye aankhon se tufan-e-nihan uThta nahin

phul raunde ja rahe hain baghban uThta nahin

be-hisi ki intiha hai hosh mein aate nahin

zillaton par zillaten hoti hain sharmate nahin

shoala-e-ehsas bujhta hai hawa de do use

qaumiyat dam toDti hai kuchh dawa de do use

mulk miTne ko hai paigham-e-baqa de do use

mutmain baiThe ho dil sine mein ghabraata nahin

qaum ke dam toDne par bhi taras aata nahin

sans le kar is faza mein ruh ghabraati nahin

jauhar-e-ehsas-e-KHuddari ko sharm aati nahin

tum ko nadari watan ki KHak taDpati nahin

ye ghulami ki bala hairat hai kha jati nahin

zindagi ko dawat-e-sad-marg dena chahiye

maut ki aaghosh mein aaram lena chahiye

chhoD do nakaami-e-qismat ke shikwe chhoD do

kuchh bhi himmat hai to ye tauq-o-salasil toD do

auj ki jaanib nigah-e-sharmagin ko moD do

rifat-e-mazi se phir taqdir-e-farda joD do

sach to ye hai qaum ke bas tum alam-bardar ho

ta-ba-kai ye KHwab-e-ghaflat so chuke bedar ho