manTo

maiñ ne us ko dekhā hai

ujlī ujlī saḌkoñ par ik gard bharī hairānī meñ

phailtī bhiiḌ ke auñdhe auñdhe kaToroñ kī tuġhyānī meñ

jab vo ḳhālī botal pheñk ke kahtā hai

''duniyā! terā husn, yahī bad-sūratī hai''

duniyā us ko ghūrtī hai

shor-e-salāsil ban kar gūñjne lagtā hai

añgāroñ bharī āñkhoñ meñ ye tund savāl

kaun hai ye jis ne apnī bahkī bahkī sāñsoñ kā jaal

bām-e-zamāñ par pheñkā hai

kaun hai jo bal khāte zamīroñ ke pur-pech dhundalkoñ meñ

rūhoñ ke ifrīt-kadoñ ke zahr-andoz mahlakoñ meñ

le aayā hai yuuñ bin pūchhe apne aap

ainak ke barfīle shīshoñ se chhantī nazroñ kī chaap

kaun hai ye gustāḳh

taaḳh taḌāḳh!

main ne us ko dekha hai

ujli ujli saDkon par ek gard bhari hairani mein

phailti bhiD ke aundhe aundhe kaToron ki tughyani mein

jab wo KHali botal phenk ke kahta hai

duniya! tera husn, yahi bad-surati hai

duniya us ko ghurti hai

shor-e-salasil ban kar gunjne lagta hai

angaron bhari aankhon mein ye tund sawal

kaun hai ye jis ne apni bahki bahki sanson ka jal

baam-e-zaman par phenka hai

kaun hai jo bal khate zamiron ke pur-pech dhundalkon mein

ruhon ke ifrit-kadon ke zahr-andoz mahlakon mein

le aaya hai yun bin puchhe apne aap

ainak ke barfile shishon se chhanti nazron ki chap

kaun hai ye gustaKH

taKH taDaKH!