bewa ki KHud-kushi

ye añdherī raat ye saarī fazā soī huī

pattī pattī manzar-e-ḳhāmosh meñ khoī huī

maujzan hai bahr-e-zulmat tīrgī kā josh hai

shaam hī se aaj qindīl-e-falak ḳhāmosh hai

chand taare haiñ bhī to be-nūr pathrā.e hue

jaise baasī haar meñ hoñ phuul kumhlā.e hue

khap gayā hai yuuñ ghaTā meñ chāñdnī kā saaf rañg

jis tarah māyūsiyoñ meñ dab ke rah jaa.e umañg

umDī hai kaalī ghaTā duniyā Dubone ke liye

yā chalī hai baal khole raañD rone ke liye

jitnī hai gunjān bastī utnī hī vīrān hai

har galī ḳhāmosh hai har rāsta sunsān hai

ik makāñ se bhī makīñ kī kuchh ḳhabar miltī nahīñ

chilmaneñ uThtī nahīñ zanjīr-e-dar hiltī nahīñ

so rahe haiñ mast-o-be-ḳhud ghar ke kul pīr-o-javāñ

ho ga.ī haiñ band husn-o-ishq meñ sargoshiyāñ

haañ magar ik samt ik goshe meñ koī nauhagar

le rahī hai karvaToñ par karvaTeñ dil thaam kar

dil sambhaltā hī nahiñ hai sīna-e-sad-chāk meñ

phuul sā chehra aTā hai bevgī kī ḳhaak meñ

uḌ chalī hai rañg-e-ruḳh ban kar hayāt-e-musta.ār

ho rahā hai qalb-e-murda meñ javānī kā fishār

hasrateñ dam toḌtī haiñ yaas kī āġhosh meñ

saikḌoñ shikve machalte haiñ lab-e-ḳhāmosh meñ

umr āmāda nahīñ murda-parastī ke liye

baar hai ye zinda mayyat dosh-e-hastī ke liye

chāhtī hai laakh qaabū dil pe paatī hī nahīñ

hā.e-re zālim javānī bas meñ aatī hī nahīñ

thartharā kar girtī hai jab suune bistar par nazar

le ke ik karvaT paTak detī hai vo takiya pe sir

jab khanak uThtī haiñ sotī laḌkiyoñ kī chūḌiyāñ

aah ban kar uThne lagtā hai kaleja se dhuāñ

ho ga.ī beva kī ḳhātir niiñd bhī jaise harām

muḳhtasar sā ahd-e-vaslat de gayā soz-e-davām

dopahar kī chhāñv daur-e-shādmānī ho gayā

pyaas bhī bujhne na paa.ī ḳhatm paanī ho gayā

le rahī hai karvaToñ par karvaTeñ bā-iztirār

aag meñ paara hai yā bistar pe jism-e-be-qarār

paḌ ga.ī ik aah kar ke ro ke uTh baiThī kabhī

uñgliyoñ meñ le ke zulf-e-ḳham-ba-ḳham aiñThī kabhī

aa ke hoñToñ par kabhī māyūs aaheñ tham ga.iiñ

aur kabhī suunī kalā.ī par nigāheñ jam ga.iiñ

itnī duniyā meñ kahīñ apnī jagah paatī nahīñ

yaas is had kī ki shauhar kī bhī yaad aatī nahīñ

aa rahe haiñ yaad paiham saas nandoñ ke sulūk

phaT rahā hai ġham se siina uTh rahī hai dil meñ huuk

apnī maañ bahnoñ kā bhī āñkheñ churānā yaad hai

aisī duniyā meñ kisī kā chhoḌ jaanā yaad hai

bāġhbāñ to qabr meñ hai kaun ab dekhe bahār

ḳhud usī ko tiir us ke karne vaale haiñ shikār

jab nazar aatā nahīñ detā koī bekas kā saath

zahr kī shīshī kī jānib ḳhud-ba-ḳhud baḌhtā hai haath

dil taḌap kar kah rahā hai jald is duniyā ko chhoḌ

chūḌiyāñ toḌīñ to phir zanjīr-e-hastī ko bhī toḌ

dam agar niklā to khoī zindagī mil jā.egī

ye nahiñ to ḳhair tanhā qabr hī mil jā.egī

vaañ tujhe zillat kī nazroñ se na dekhegā koī

chāhe hañsnā chāhe ronā phir na rokegā koī

vaañ sab ahl-e-dard haiñ sab sāhab-e-insāf haiñ

rahbar aage jā chukā rāheñ bhī terī saaf haiñ

dil inhīñ bātoñ meñ uljhā thā ki dam ghabrā gayā

haath le kar zahr kī shīshī laboñ tak aa gayā

tilmilātī aañkh jhapkātī jhijaktī hāñptī

pī ga.ī kul zahr āḳhir thartharātī kāñptī

maut ne jhaTkā diyā kul uzv Dhīle ho ga.e

saañs ukhḌī, nabz Dūbī, hoñT niile ho ga.e

aañkh jhapkī ashk Tapkā hichkī aa.ī kho ga.ī

maut kī āġhosh meñ ik aah bhar kar so ga.ī

aur kar ik aah sulge hind kī rasmoñ kā daam

ai javānā-marg beva tujh pe 'kaifī' kā salām

ye andheri raat ye sari faza soi hui

patti patti manzar-e-KHamosh mein khoi hui

maujzan hai bahr-e-zulmat tirgi ka josh hai

sham hi se aaj qindil-e-falak KHamosh hai

chand tare hain bhi to be-nur pathrae hue

jaise basi haar mein hon phul kumhlae hue

khap gaya hai yun ghaTa mein chandni ka saf rang

jis tarah mayusiyon mein dab ke rah jae umang

umDi hai kali ghaTa duniya Dubone ke liye

ya chali hai baal khole ranD rone ke liye

jitni hai gunjaan basti utni hi viran hai

har gali KHamosh hai har rasta sunsan hai

ek makan se bhi makin ki kuchh KHabar milti nahin

chilmanen uThti nahin zanjir-e-dar hilti nahin

so rahe hain mast-o-be-KHud ghar ke kul pir-o-jawan

ho gai hain band husn-o-ishq mein sargoshiyan

han magar ek samt ek goshe mein koi nauhagar

le rahi hai karwaTon par karwaTen dil tham kar

dil sambhalta hi nahin hai sina-e-sad-chaak mein

phul sa chehra aTa hai bewgi ki KHak mein

uD chali hai rang-e-ruKH ban kar hayat-e-mustaar

ho raha hai qalb-e-murda mein jawani ka fishaar

hasraten dam toDti hain yas ki aaghosh mein

saikDon shikwe machalte hain lab-e-KHamosh mein

umr aamada nahin murda-parasti ke liye

bar hai ye zinda mayyat dosh-e-hasti ke liye

chahti hai lakh qabu dil pe pati hi nahin

hae-re zalim jawani bas mein aati hi nahin

tharthara kar girti hai jab sune bistar par nazar

le ke ek karwaT paTak deti hai wo takiya pe sir

jab khanak uThti hain soti laDkiyon ki chuDiyan

aah ban kar uThne lagta hai kaleja se dhuan

ho gai bewa ki KHatir nind bhi jaise haram

muKHtasar sa ahd-e-waslat de gaya soz-e-dawam

dopahar ki chhanw daur-e-shadmani ho gaya

pyas bhi bujhne na pai KHatm pani ho gaya

le rahi hai karwaTon par karwaTen ba-iztirar

aag mein para hai ya bistar pe jism-e-be-qarar

paD gai ek aah kar ke ro ke uTh baiThi kabhi

ungliyon mein le ke zulf-e-KHam-ba-KHam ainThi kabhi

aa ke honTon par kabhi mayus aahen tham gain

aur kabhi suni kalai par nigahen jam gain

itni duniya mein kahin apni jagah pati nahin

yas is had ki ki shauhar ki bhi yaad aati nahin

aa rahe hain yaad paiham sas nandon ke suluk

phaT raha hai gham se sina uTh rahi hai dil mein huk

apni man bahnon ka bhi aankhen churana yaad hai

aisi duniya mein kisi ka chhoD jaana yaad hai

baghban to qabr mein hai kaun ab dekhe bahaar

KHud usi ko tir us ke karne wale hain shikar

jab nazar aata nahin deta koi bekas ka sath

zahr ki shishi ki jaanib KHud-ba-KHud baDhta hai hath

dil taDap kar kah raha hai jald is duniya ko chhoD

chuDiyan toDin to phir zanjir-e-hasti ko bhi toD

dam agar nikla to khoi zindagi mil jaegi

ye nahin to KHair tanha qabr hi mil jaegi

wan tujhe zillat ki nazron se na dekhega koi

chahe hansna chahe rona phir na rokega koi

wan sab ahl-e-dard hain sab sahab-e-insaf hain

rahbar aage ja chuka rahen bhi teri saf hain

dil inhin baaton mein uljha tha ki dam ghabra gaya

hath le kar zahr ki shishi labon tak aa gaya

tilmilati aankh jhapkati jhijakti hanpti

pi gai kul zahr aaKHir thartharaati kanpti

maut ne jhaTka diya kul uzw Dhile ho gae

sans ukhDi, nabz Dubi, honT nile ho gae

aankh jhapki ashk Tapka hichki aai kho gai

maut ki aaghosh mein ek aah bhar kar so gai

aur kar ek aah sulge hind ki rasmon ka dam

ai jawana-marg bewa tujh pe 'kaifi' ka salam