bhagat-singh ke nam

kahīñ jab sarfaroshī kī

mohabbat istaqāmat kī

shahādat kī vatan kī baat chaltī hai

mujhe tum yaad aate ho

ye dhāre ruk nahīñ sakte

sitāre jhuk nahīñ sakte

kināre dekhte rahnā

nazāre ruk nahīñ sakte

havā bahtī hī rahtī hai

samundar se samundar tak

lahū daryāft kartā hai

na.ī tahrīk kā manshūr

ye kirneñ darj kartī haiñ

har ik dhartī pe hone kā nayā dastūr

har ik raste pe haiñ dār-o-rasan ke nīlgūñ saa.e

lahū se aag kī lapTeñ nikaltī haiñ

qatāroñ meñ dar-e-zindāñ pe har lamha

ajab sī bhiiḌ rahtī hai

ye kaisī aag hai jo sard hone ko nahīñ aatī

ye kaisā ḳhvāb hai ta.abīr āñkheñ chhīn letī hai

shujā.at qarz hotī hai

mohabbat farz hotī hai

kisī colonel ke qatl-e-ām se lashkar nahīñ rukte

salīboñ se nahīñ Darte

lahū ke dhāre meñ bahte sitāre ruk nahīñ sakte

abad ke āsmānoñ se ishāre ruk nahīñ sakte

ajab hī log hote haiñ

ḳhud apnī miTTī kī ḳhātir jo jān-o-tan luTāte haiñ

ġhazab hī log hote haiñ

ki jo tārīḳh ke dhāre ke ruḳh ko moḌ dete haiñ

mohabbat karne vaale log pāgal log hote haiñ

kisī se jo nahīñ Darte

ye vo dariyā haiñ jin kī āḳhirī manzil

abad kā āḳhirī sāhil

ye vo dariyā samundar jin kā rasta hai

samundar kis se kab tasḳhīr hotā hai

samundar hai zamāna

aur zamāna kis se kab zanjīr hotā hai

kahin jab sarfaroshi ki

mohabbat istaqamat ki

shahadat ki watan ki baat chalti hai

mujhe tum yaad aate ho

ye dhaare ruk nahin sakte

sitare jhuk nahin sakte

kinare dekhte rahna

nazare ruk nahin sakte

hawa bahti hi rahti hai

samundar se samundar tak

lahu daryaft karta hai

nai tahrik ka manshur

ye kirnen darj karti hain

har ek dharti pe hone ka naya dastur

har ek raste pe hain dar-o-rasan ke nilgun sae

lahu se aag ki lapTen nikalti hain

qataron mein dar-e-zindan pe har lamha

ajab si bhiD rahti hai

ye kaisi aag hai jo sard hone ko nahin aati

ye kaisa KHwab hai tabir aankhen chhin leti hai

shujaat qarz hoti hai

mohabbat farz hoti hai

kisi colonel ke qatl-e-am se lashkar nahin rukte

salibon se nahin Darte

lahu ke dhaare mein bahte sitare ruk nahin sakte

abad ke aasmanon se ishaare ruk nahin sakte

ajab hi log hote hain

KHud apni miTTi ki KHatir jo jaan-o-tan luTate hain

ghazab hi log hote hain

ki jo tariKH ke dhaare ke ruKH ko moD dete hain

mohabbat karne wale log pagal log hote hain

kisi se jo nahin Darte

ye wo dariya hain jin ki aaKHiri manzil

abad ka aaKHiri sahil

ye wo dariya samundar jin ka rasta hai

samundar kis se kab tasKHir hota hai

samundar hai zamana

aur zamana kis se kab zanjir hota hai