bhagwan krishn ki taswir dekh kar

mujhe tere tasavvur se ḳhushī mahsūs hotī hai

dil-e-murda meñ bhī kuchh zindagī mahsūs hotī hai

ye tāroñ kī chamak meñ hai na phūloñ hī kī ḳhushbū meñ

tirī tasvīr meñ jo dilkashī mahsūs hotī hai

tujhe maiñ aaj tak masrūf-e-dars-o-va.az paatā huuñ

tirī hastī mukammal āgahī mahsūs hotī hai

ye kyā mumkin nahīñ tū aa ke ḳhud ab is kā darmāñ kar

fazā-e-dahr meñ kuchh barhamī mahsūs hotī hai

ujālā sā ujālā hai tirī sham-e-hidāyat kā

shab-e-tīra meñ bhī ik raushnī mahsūs hotī hai

maiñ aa.uuñ bhī to kyā muñh le ke aa.uuñ sāmne tere

ḳhud apne-āp se sharmindagī mahsūs hotī hai

taḳhayyul meñ tire nazdīk jab maiñ ḳhud ko paatā huuñ

mujhe us vaqt ik-tarfa ḳhushī mahsūs hotī hai

tū hī jaane kahāñ le aa.ī mujh ko aarzū terī

ye manzil ab sarāpā be-ḳhudī mahsūs hotī hai

'kañval' jis vaqt kho jaatā huuñ maiñ us ke tasavvur meñ

mujhe to zindagī hī zindagī mahsūs hotī hai

mujhe tere tasawwur se KHushi mahsus hoti hai

dil-e-murda mein bhi kuchh zindagi mahsus hoti hai

ye taron ki chamak mein hai na phulon hi ki KHushbu mein

teri taswir mein jo dilkashi mahsus hoti hai

tujhe main aaj tak masruf-e-dars-o-waz pata hun

teri hasti mukammal aagahi mahsus hoti hai

ye kya mumkin nahin tu aa ke KHud ab is ka darman kar

faza-e-dahr mein kuchh barhami mahsus hoti hai

ujala sa ujala hai teri sham-e-hidayat ka

shab-e-tira mein bhi ek raushni mahsus hoti hai

main aaun bhi to kya munh le ke aaun samne tere

KHud apne-ap se sharmindagi mahsus hoti hai

taKHayyul mein tere nazdik jab main KHud ko pata hun

mujhe us waqt ik-tarfa KHushi mahsus hoti hai

tu hi jaane kahan le aai mujh ko aarzu teri

ye manzil ab sarapa be-KHudi mahsus hoti hai

'kanwal' jis waqt kho jata hun main us ke tasawwur mein

mujhe to zindagi hi zindagi mahsus hoti hai