bharose ka qatl

maz.hab kī talvār banā kar

ḳhvāhishoñ ke andhe ghoḌe par savār

mere man āñgan ko rauñd Daalā

mere bharose ko suulī par Taañg kar

tum ne dūsrā byaah rachā liyā

tumhāre sañg guzāre pal pal ko

maiñ ne apne maas par khaal kī tarah mundh liyā thā

tumhāre saath āñchal bāñdh kar

baabā kā āñgan paar kar ke

tumhāre laa.e sāñche meñ

maiñ ne paayā thā apnā vajūd

pyaar kyā hai ye nahīñ jāntī

par tumhāre ghar ne baḌ ke peḌ sī chhāñv kī thī mujh par

bachāyā thā zamāne ke gunāhoñ ke

tīroñ kī bauchhaḌ se

is sāñche meñ rahne kī ḳhātir

maiñ apne vajūd ko kāTtī chhañTtī tarāshtī rahī

tumhāre lahū kī buuñd ko apne maas meñ janm diyā

aulād bhī ham donoñ kā bandhan na ban sakī

bandhan kyā hai ye nahīñ jāntī

mujhe faqat ek sabaq paḌhāyā gayā thā

tumhārā ghar merī āḳhirī panāh-gāh hai

maiñ ne ka.ī baar dekhā hai

zamāne kī nigāhoñ se sañgsār hote

talāq-yāfta aurat ko

is liye bārish se Darī billī kī tarah

ghar ke ek kone aur tumhāre naam ke istīma.al par

qanā.at kiye baiThī rahī

jannat kyā hai jahannam kyā hai ye nahīñ jāntī

magar itnā yaqīn hai

jannat bharose se bālā-tar nahīñ

aur jahannam saut ke qahqahoñ se baḌh kar girāñ nahīñ

tānoñ aur rahm bharī nazroñ se baḌh kar mushkil

koī pul-sirāt nahīñ

kabhī kabhī sot kā chehra mujhe apnā jaisā lagtā hai

us kī peshānī par bhī

maiñ ne be-e'tibārī kī shikneñ dekhī haiñ

jab vo mujhe dekhtī hai

ḳhushī us ke siine meñ

hāthoñ meñ dabā.e kabūtar kī tarah phaḌ phaḌā uThtī hai

maiñ un se laḌ nahīñ saktī

un meñ tum shāmil ho

maiñ tum se laḌ nahīñ saktī

maz.hab qānūn aur samāj tumhāre saath haiñ

rīteñ rasmeñ tumhāre hathiyār haiñ

dil chāhtā hai ki zindagī kī kitāb se

vo baab hī phaaḌ kar pheñk duuñ

jo apne mafād meñ tum ne

mere muqaddar meñ likkhā hai

mazhab ki talwar bana kar

KHwahishon ke andhe ghoDe par sawar

mere man aangan ko raund Dala

mere bharose ko suli par Tang kar

tum ne dusra byah racha liya

tumhaare sang guzare pal pal ko

main ne apne mas par khaal ki tarah mundh liya tha

tumhaare sath aanchal bandh kar

baba ka aangan par kar ke

tumhaare lae sanche mein

main ne paya tha apna wajud

pyar kya hai ye nahin jaanti

par tumhaare ghar ne baD ke peD si chhanw ki thi mujh par

bachaya tha zamane ke gunahon ke

tiron ki bauchhaD se

is sanche mein rahne ki KHatir

main apne wajud ko kaTti chhanTti tarashti rahi

tumhaare lahu ki bund ko apne mas mein janm diya

aulad bhi hum donon ka bandhan na ban saki

bandhan kya hai ye nahin jaanti

mujhe faqat ek sabaq paDhaya gaya tha

tumhaara ghar meri aaKHiri panah-gah hai

main ne kai bar dekha hai

zamane ki nigahon se sangsar hote

talaq-yafta aurat ko

is liye barish se Dari billi ki tarah

ghar ke ek kone aur tumhaare nam ke istimal par

qanaat kiye baiThi rahi

jannat kya hai jahannam kya hai ye nahin jaanti

magar itna yaqin hai

jannat bharose se baala-tar nahin

aur jahannam saut ke qahqahon se baDh kar giran nahin

tanon aur rahm bhari nazron se baDh kar mushkil

koi pul-siraat nahin

kabhi kabhi sot ka chehra mujhe apna jaisa lagta hai

us ki peshani par bhi

main ne be-e'tibari ki shiknen dekhi hain

jab wo mujhe dekhti hai

KHushi us ke sine mein

hathon mein dabae kabutar ki tarah phaD phaDa uThti hai

main un se laD nahin sakti

un mein tum shamil ho

main tum se laD nahin sakti

mazhab qanun aur samaj tumhaare sath hain

riten rasmen tumhaare hathiyar hain

dil chahta hai ki zindagi ki kitab se

wo bab hi phaD kar phenk dun

jo apne mafad mein tum ne

mere muqaddar mein likkha hai