bhiga mausam

us ne kahā thā chhoTī sī farmā.ish hai!

maiñ ne kahā thā bholī-bhālī ḳhvāhish hai!

us ne kahā thā ruuh meñ ḳhārish hotī hai

maiñ ne kahā thā jismoñ kī sāzish hotī hai

us ne kahā thā bādal kaale hote haiñ

maiñ ne kahā thā bijlī gorī hotī hai!

is ne kahā thā jab donoñ Takrāte haiñ!!

maiñ ne kahā thā phir to bārish hotī hai!!!!

us ne kahā thā bārish meñ chhīñTe paḌte haiñ

maiñ ne kahā thā kapḌe bhī giile hote haiñ

is ne kahā thā bhīgne vaalā hai mausam

maiñ ne kahā bhaag nahīñ pā.eñge ham!!

saarā aalam bhiig rahā thā bārish meñ

apne apne zarf meñ, apnī ḳhvāhish meñ

sharābor the ham donoñ rafta rafta

andar bāhar bhiig ga.e jasta jasta

jazboñ kā sābun, ehsās kā paanī thā

bārish ke do bhīge tan par

dhuup utarne vaalī thī

dhulā dhulā fitrat kā saarā manzar thā

par phailā.e...

do panchhī be-sudh the

ġhaib kī mastī meñ!!

sunte haiñ:

phir aag lagī thī bastī meñ!!!!

us ne kaha tha chhoTi si farmaish hai!

main ne kaha tha bholi-bhaali KHwahish hai!

us ne kaha tha ruh mein KHarish hoti hai

main ne kaha tha jismon ki sazish hoti hai

us ne kaha tha baadal kale hote hain

main ne kaha tha bijli gori hoti hai!

is ne kaha tha jab donon Takraate hain!!

main ne kaha tha phir to barish hoti hai!!!!

us ne kaha tha barish mein chhinTe paDte hain

main ne kaha tha kapDe bhi gile hote hain

is ne kaha tha bhigne wala hai mausam

main ne kaha bhag nahin paenge ham!!

sara aalam bhig raha tha barish mein

apne apne zarf mein, apni KHwahish mein

sharabor the hum donon rafta rafta

andar bahar bhig gae jasta jasta

jazbon ka sabun, ehsas ka pani tha

barish ke do bhige tan par

dhup utarne wali thi

dhula dhula fitrat ka sara manzar tha

par phailae

do panchhi be-sudh the

ghaib ki masti mein!!

sunte hain:

phir aag lagi thi basti mein!!!!