bhuk

alassabāh ki duniyā thī mahv-e-ḳhvāb abhī

chhupā thā hujra-e-mashriq meñ āftāb abhī

falak pe anjuman-e-shab kā thā asar baaqī

ghirā huā thā sitāroñ meñ māhtāb abhī

fazā.eñ gum thiiñ dhundalke meñ āḳhir-e-shab ke

urūh-e-sub.h ke chehre pe thī naqāb abhī

liyā na thā abhī sūraj ne bosa-e-āriz

salone rañg meñ nikhrā na thā shabāb abhī

na aa.ī thī abhī surḳhī ufuq ke chehre par

shafaq ne charḳh pe chhiḌkī na thī sharāb abhī

ġhunūdgī meñ fazā.eñ thiiñ sar jhukā.e hue

maiñ jā rahā thā saḌak par qadam baḌhā.e hue

magar thā pesh-e-nazar ik muraqqa-e-adbār

dil-e-ġharīb kī sūrat udaas thā bāzār

ba-juz sadā-e-nafas ke kahīñ na thī āvāz

ba-juz havā-e-sahar ke koī na thā bedār

vo koThiyāñ vo tarab-ḳhāna-hā-e-daulat-o-aish

jahāñ the āḳhir-e-shab tak hayāt ke āsār

vahāñ bhī maut ke baiThe hue the pahre-dār

na sham.a thī na patañge na bazm thī na bahār

gadāgaroñ ke ka.ī qāfile ba-hāl-e-tabāh

paḌe hue the sar-e-rāh niiñd meñ sarshār

yakāyak ek taraf uTh ga.ī jo merī nazar

ajab tarah kā nazar aayā sāmne manzar

galī ke moḌ par ik aadmī pareshāñ-hāl

ki jis kī shām-e-javānī thī sogvār-e-zavāl

jhukī jhukī huī nazreñ ruñDhā ruñDhā huā dil

dhañsī dhañsī huī āñkheñ saTe saTe hue gaal

barahna jism ḳhamīda kamar ramīda havās

badan niDhāl tabī.at niDhāl ruuh niDhāl

zabān-e-laġhzish-e-pā par fasāna-e-shab-o-roz

sutūr-e-chīn-e-jabīñ meñ hadīs-e-māzī-o-hāl

samajh gayā maiñ use dekhte hī haal us kā

ki us kī shakl ba-yak-vaqt thī javāb-o-savāl

bisāt-e-kāk pe baiThā huā thā ḳhāk-basar

paḌī thī sāmne kuuḌe pe kuchh saḌī huī daal

sag-e-gursna kī mānind chāTtā thā use

burā thā bhuuk se kuchh is qadar ġharīb kā haal

maiñ us muhīb nazāre kī taab lā na sakā

qadam jame ke jame rah ga.e uThā na sakā

alassabah ki duniya thi mahw-e-KHwab abhi

chhupa tha hujra-e-mashriq mein aaftab abhi

falak pe anjuman-e-shab ka tha asar baqi

ghira hua tha sitaron mein mahtab abhi

fazaen gum thin dhundalke mein aaKHir-e-shab ke

uruh-e-subh ke chehre pe thi naqab abhi

liya na tha abhi suraj ne bosa-e-ariz

salone rang mein nikhra na tha shabab abhi

na aai thi abhi surKHi ufuq ke chehre par

shafaq ne charKH pe chhiDki na thi sharab abhi

ghunudgi mein fazaen thin sar jhukae hue

main ja raha tha saDak par qadam baDhae hue

magar tha pesh-e-nazar ek muraqqa-e-adbar

dil-e-gharib ki surat udas tha bazar

ba-juz sada-e-nafas ke kahin na thi aawaz

ba-juz hawa-e-sahar ke koi na tha bedar

wo koThiyan wo tarab-KHana-ha-e-daulat-o-aish

jahan the aaKHir-e-shab tak hayat ke aasar

wahan bhi maut ke baiThe hue the pahre-dar

na shama thi na patange na bazm thi na bahaar

gadagaron ke kai qafile ba-haal-e-tabah

paDe hue the sar-e-rah nind mein sarshaar

yakayak ek taraf uTh gai jo meri nazar

ajab tarah ka nazar aaya samne manzar

gali ke moD par ek aadmi pareshan-haal

ki jis ki sham-e-jawani thi sogwar-e-zawal

jhuki jhuki hui nazren runDha runDha hua dil

dhansi dhansi hui aankhen saTe saTe hue gal

barahna jism KHamida kamar ramida hawas

badan niDhaal tabiat niDhaal ruh niDhaal

zaban-e-laghzish-e-pa par fasana-e-shab-o-roz

sutur-e-chin-e-jabin mein hadis-e-mazi-o-haal

samajh gaya main use dekhte hi haal us ka

ki us ki shakl ba-yak-waqt thi jawab-o-sawal

bisat-e-kak pe baiTha hua tha KHak-basar

paDi thi samne kuDe pe kuchh saDi hui dal

sag-e-gursna ki manind chaTta tha use

bura tha bhuk se kuchh is qadar gharib ka haal

main us muhib nazare ki tab la na saka

qadam jame ke jame rah gae uTha na saka