bhulti hui yaad

tumheñ jab yaad kartā huuñ to ik miTtī huī duniyā

mirī āñkhoñ ke ā.īne meñ pahroñ jhilmilātī hai

kahīñ dam ghuT rahā hai muskurāte surḳh phūloñ kā

kahīñ kaliyoñ ke siine meñ havā ruk ruk ke aatī hai

kahīñ kajlā ga.e haiñ din ke chamkā.e hue zarre

kahīñ rātoñ kī hañstī raushnī ġham meñ nahātī hai

vahī duniyā jo kal tak dil kā dāman thaam letī thī

usī duniyā ke har zarre meñ ab be-iltifātī hai

tamannā apnī nākāmī pe kaañp uThtī hai yuuñ jaise

bagūle meñ koī sūkhī sī pattī thartharātī hai

ghane kohre meñ jaise Dhañkte jaate hoñ hare sabze

yuuñ hī biite dinoñ kī shakl dhundlī paḌtī jaatī hai

javānī kī añdherī raat aadhī bhī nahīñ guzrī

mohabbat ke diye kī lau abhī se thartharātī hai

tumhein jab yaad karta hun to ek miTti hui duniya

meri aankhon ke aaine mein pahron jhilmilati hai

kahin dam ghuT raha hai muskuraate surKH phulon ka

kahin kaliyon ke sine mein hawa ruk ruk ke aati hai

kahin kajla gae hain din ke chamkae hue zarre

kahin raaton ki hansti raushni gham mein nahati hai

wahi duniya jo kal tak dil ka daman tham leti thi

usi duniya ke har zarre mein ab be-iltifati hai

tamanna apni nakaami pe kanp uThti hai yun jaise

bagule mein koi sukhi si patti thartharaati hai

ghane kohre mein jaise Dhankte jate hon hare sabze

yun hi bite dinon ki shakl dhundli paDti jati hai

jawani ki andheri raat aadhi bhi nahin guzri

mohabbat ke diye ki lau abhi se thartharaati hai