bimari ki KHabar

jab ḳhat meñ tum likh detī ho kuchh haal apnī bīmārī kā

maiñ baiTh ke tanhā.ī meñ jaane kyā kyā sochā kartā huuñ

kuchh andhe koḌhī dīvāne āñkhoñ meñ samāne lagte haiñ

kuchh qaht-zada bhūke pyāse jaañ ḳhāmoshī se de de kar

duniyā meñ muflis rahne kī tāzīreñ paane lagte haiñ

kaTte haiñ jin ke shām-o-sahar ik qābil-e-nafrat ḳhvārī se

jo marte haiñ āsānī se aur jiite haiñ dushvārī se

ḳhuuñ chuus liyā hai ġhairoñ ne bīmār bhī haiñ nādān bhī haiñ

jiine kī tamannā dil meñ hai aur jiine se bezār bhī haiñ

is dard kī maarī duniyā meñ aise insāñ kyuuñ baste haiñ

jo saarī umar zarūrat kī chīzoñ ke liye bhī taraste haiñ

go aise log bhī haiñ jin ko āsā.ish hī āsā.ish hai

vo sab hai muhayyā un ke liye jis chiiz kī un ko ḳhvāhish hai

jin ke liye sonā miTTī hai jin ke liye motī saste haiñ

lekin majbūr insānoñ ko kyuuñ haq nahīñ hāsil jiine kā

tūfān hī ke qabze meñ kyuuñ patvār hai un ke safīne kā

kab tak be-bas insāñ yūñhī taqdīr kā ronā ro.egā

kab tak be kuchh paa.e hue apnā hī sab kuchh kho.egā

kab tak andhī bheḌoñ kī tarah ye apnī raah na pā.egā

kab tak maut ke aage se pīchhe hī haTtā jā.egā

phir ḳhud hī dil bol uThtā hai ab vaqt badalne vaalā hai

zarre sūraj ban jā.eñge vo daur bhī aane vaalā hai

ummīd kī ik nannhī sī kiran māyūsī par chhā jaatī hai

aur us kī zau meñ ek na.ī duniyā baazū phailātī hai

suuī sī ragoñ meñ chubhtī hai āñkhoñ meñ aañsū aate haiñ

dil be-qābū ho jaatā hai jiine kī havas baḌh jaatī hai

jaañ vaqf-e-tapish ho jaatī hai aur azm-e-baġhāvat kartī hai

us vaqt ik sail irādoñ kī sīnoñ se ho ke guzartī hai

duniyā ko ḳhuld banāne kā jo dhyān sā dil meñ aatā hai

aisī ḳhabroñ ke sunñe se vo aur qavī ho jaatā hai

jab ḳhat meñ tum likh detī ho kuchh haal apnī bīmārī kā

maiñ baiTh ke tanhā.ī meñ jaane kyā kyā sochā kartā huuñ

ham jañg kareñge fitrat se fitrat par qaabū pā.eñge

aur fitrat par qaabū pā kar ik roz amar ban jā.eñge

jab KHat mein tum likh deti ho kuchh haal apni bimari ka

main baiTh ke tanhai mein jaane kya kya socha karta hun

kuchh andhe koDhi diwane aankhon mein samane lagte hain

kuchh qaht-zada bhuke pyase jaan KHamoshi se de de kar

duniya mein muflis rahne ki taziren pane lagte hain

kaTte hain jin ke sham-o-sahar ek qabil-e-nafrat KHwari se

jo marte hain aasani se aur jite hain dushwari se

KHun chus liya hai ghairon ne bimar bhi hain nadan bhi hain

jine ki tamanna dil mein hai aur jine se bezar bhi hain

is dard ki mari duniya mein aise insan kyun baste hain

jo sari umar zarurat ki chizon ke liye bhi taraste hain

go aise log bhi hain jin ko aasaish hi aasaish hai

wo sab hai muhayya un ke liye jis chiz ki un ko KHwahish hai

jin ke liye sona miTTi hai jin ke liye moti saste hain

lekin majbur insanon ko kyun haq nahin hasil jine ka

tufan hi ke qabze mein kyun patwar hai un ke safine ka

kab tak be-bas insan yunhi taqdir ka rona roega

kab tak be kuchh pae hue apna hi sab kuchh khoega

kab tak andhi bheDon ki tarah ye apni rah na paega

kab tak maut ke aage se pichhe hi haTta jaega

phir KHud hi dil bol uThta hai ab waqt badalne wala hai

zarre suraj ban jaenge wo daur bhi aane wala hai

ummid ki ek nannhi si kiran mayusi par chha jati hai

aur us ki zau mein ek nai duniya bazu phailati hai

sui si ragon mein chubhti hai aankhon mein aansu aate hain

dil be-qabu ho jata hai jine ki hawas baDh jati hai

jaan waqf-e-tapish ho jati hai aur azm-e-baghawat karti hai

us waqt ek sail iradon ki sinon se ho ke guzarti hai

duniya ko KHuld banane ka jo dhyan sa dil mein aata hai

aisi KHabron ke sunne se wo aur qawi ho jata hai

jab KHat mein tum likh deti ho kuchh haal apni bimari ka

main baiTh ke tanhai mein jaane kya kya socha karta hun

hum jang karenge fitrat se fitrat par qabu paenge

aur fitrat par qabu pa kar ek roz amar ban jaenge