bint-e-lamhat

tumhāre lahje meñ jo garmī o halāvat hai

use bhalā sā koī naam do vafā kī jagah

ġhanīm-e-nūr kā hamla kaho añdheroñ par

dayār-e-dard meñ aamad kaho masīhā kī

ravāñ-davāñ hue ḳhushbū ke qāfile har-sū

ḳhalā-e-sub.h meñ gūñjī sahar kī shahnā.ī

ye ek kohrā saa, ye dhund sī jo chhā.ī hai

is iltihāb meñ, is surmagīñ ujāle meñ

sivā tumhāre mujhe kuchh nazar nahīñ aatā

hayāt naam hai yādoñ kaa, talḳh aur shīrīñ

bhalā kisī ne kabhī rañg o bū ko pakḌā hai

shafaq ko qaid meñ rakkhā sabā ko band kiyā

har ek lamha gurezāñ hai, jaise dushman hai

na tum milogī na maiñ, ham bhī donoñ lamhe haiñ

vo lamhe jā ke jo vāpas kabhī nahīñ aate!

tumhaare lahje mein jo garmi o halawat hai

use bhala sa koi nam do wafa ki jagah

ghanim-e-nur ka hamla kaho andheron par

dayar-e-dard mein aamad kaho masiha ki

rawan-dawan hue KHushbu ke qafile har-su

KHala-e-subh mein gunji sahar ki shahnai

ye ek kohra sa, ye dhund si jo chhai hai

is iltihab mein, is surmagin ujale mein

siwa tumhaare mujhe kuchh nazar nahin aata

hayat nam hai yaadon ka, talKH aur shirin

bhala kisi ne kabhi rang o bu ko pakDa hai

shafaq ko qaid mein rakkha saba ko band kiya

har ek lamha gurezan hai, jaise dushman hai

na tum milogi na main, hum bhi donon lamhe hain

wo lamhe ja ke jo wapas kabhi nahin aate!