bint-e-mahtab

siyāh zulf ki barsāt kī ho jaise ghaTā

mizāj-e-sub.h-e-daraḳhshāñ tirī jabīñ kī ziyā

hasīn gāloñ pe bikhrā huā vo rang-e-hayā

namī vo hoñToñ kī jis meñ nabāt-o-asl ghulā

na kyuuñ bhalā maiñ tujhe bint-e-māhtāb kahūñ

jo aañkh nargis-e-shahlā kī aabrū le le

palak na jis pe kabhī ashk-e-muztarib khele

chhue jo chāñd ko to haath hoñ tire maile

har ek ang hasīñ kis kā zikr ho pahle

tujhe maiñ jān-e-jahāñ rashk-e-āftāb kahūñ

vo jazr-o-mad tire siine kā aur vo jazbāt

haiñ mere vāste vahshat-ḳharosh ye lamhāt

tirī zabān kī jumbish meñ saiñkaḌoñ naġhmāt

vo dil-pasand ḳhasā.il vo dil-nashīñ ādāt

na kyuuñ bhalā maiñ tujhe hāsil-e-shabāb kahūñ

yahī kahūñ ki milī tujh ko husn kī me.arāj

ḳhushā nasīb jo kahlā.e dil-bar-e-‘sartāj’

tirī jabīñ kā araq rashk-e-nīlam-o-pukhrāj

tire jamāl ne gulshan se le liyā hai ḳhirāj

tire vajūd ko maiñ vaj.h-e-inqalāb kahūñ

siyah zulf ki barsat ki ho jaise ghaTa

mizaj-e-subh-e-daraKHshan teri jabin ki ziya

hasin galon pe bikhra hua wo rang-e-haya

nami wo honTon ki jis mein nabaat-o-asl ghula

na kyun bhala main tujhe bint-e-mahtab kahun

jo aankh nargis-e-shahla ki aabru le le

palak na jis pe kabhi ashk-e-muztarib khele

chhue jo chand ko to hath hon tere maile

har ek ang hasin kis ka zikr ho pahle

tujhe main jaan-e-jahan rashk-e-aftab kahun

wo jazr-o-mad tere sine ka aur wo jazbaat

hain mere waste wahshat-KHarosh ye lamhat

teri zaban ki jumbish mein sainkaDon naghmat

wo dil-pasand KHasail wo dil-nashin aadat

na kyun bhala main tujhe hasil-e-shabab kahun

yahi kahun ki mili tujh ko husn ki mearaj

KHusha nasib jo kahlae dil-bar-e-‘sartaj’

teri jabin ka araq rashk-e-nilam-o-pukhraj

tere jamal ne gulshan se le liya hai KHiraj

tere wajud ko main wajh-e-inqalab kahun