bisat-e-raqs

mujhe likhnā thā sarshārī

mujhe likhnā thā dildārī

mujhe likhnā thā apnā half-nāma

aur bayān-e-istiġhāsa

bādshāh-e-vaqt ke maġhrūr aivān-e-adālat meñ

umaDtī ḳhalq kī maujūdgī meñ

vārdāt-e-qatl-e-ḳhūbāñ ke haqā.eq

aur bayān-e-ḳhalq-e-barham

maiñ qāsid thā

ġhulāmoñ kā farastāda

mire hone meñ muzmar thī ḳharābī

jumla imkānāt-e-mohlik

ik bharī bandūq

maiñ shā.ir thā

mujhe elaan karnā thā

mire elaan par honī thī saf-bandī

hisāb-e-ḳhūñ-bahā

bebāk honā thā

rabāb-e-zindagī par

aarzū kā alamiya gaanā

alal-ailān

chaurāhoñ pe

be-ḳhud honā

gaanā

raqs karnā

aur mar jaanā

mirā mansab muqarrar thā

mujhe likhna tha sarshaari

mujhe likhna tha dildari

mujhe likhna tha apna half-nama

aur bayan-e-istighasa

baadshah-e-waqt ke maghrur aiwan-e-adalat mein

umaDti KHalq ki maujudgi mein

wardat-e-qatl-e-KHuban ke haqaeq

aur bayan-e-KHalq-e-barham

main qasid tha

ghulamon ka farastada

mere hone mein muzmar thi KHarabi

jumla imkanat-e-mohlik

ek bhari banduq

main shair tha

mujhe elan karna tha

mere elan par honi thi saf-bandi

hisab-e-KHun-baha

bebak hona tha

rabab-e-zindagi par

aarzu ka alamiya gana

alal-ailan

chaurahon pe

be-KHud hona

gana

raqs karna

aur mar jaana

mera mansab muqarrar tha