buDhape ki choTi

umr aur rāste kaTte chale ga.e

abhī abhī sāñseñ sambhalī thī

na jaane kab hausle bhī sambhalte chale ga.e

shurūātī ye rāste sīdhe-saral saaf huā karte the

ūñchā.ī pe baḌhte hī pathrīle hue kāñToñ se grast

haañ kabhī koī jharnā mil jaatā thā

peḌ bhī chhāñv le kar merī madad ko aate the

vo jharne vo chhāñv magar saath na chal paate the

vaqt thā jo saath chalā mere

ek roz vo bhī chalā gayā tajarbe kī peTī de kar

ab use bhī uThā.e chalnā hai sambhāle rakhnā hai

sāñsoñ kī tarah hausloñ kī tarah

rāste meñ milegā vo phir se

aur māñgegā mujh se us peTī meñ se kuchh

yā de jā.egā do chaar aur bhī uThāne ko

vaqt miltā gayā moḌ aate ga.e kuchh log bhī

bojh kam hotā phir baḌh bhī jaatā

rāsto meñ bhaTak bhī jaatā kahīñ kahīñ

bojh bhārī huā thā thakī āñkhoñ kā bhī ek bojh thā

buḌhāpe kī choTī ab abhī mīloñ duur thī

par vahāñ shāyad sukūn hogā

kahīñ pahuñch jaane kī rāhat hogī

chāñd kī ThanDak mere qarīb hogī

us choTī pe pahuñch kar

thake hue pairoñ ko kināre rakh dūñgā

kyūñki vahāñ se aage ab kuchh na hogā chalne ko

aañkh mūñdne kī mujhe ab ijāzat hogī

umr aur raste kaTte chale gae

abhi abhi sansen sambhali thi

na jaane kab hausle bhi sambhalte chale gae

shuruati ye raste sidhe-saral saf hua karte the

unchai pe baDhte hi pathrile hue kanTon se grast

han kabhi koi jharna mil jata tha

peD bhi chhanw le kar meri madad ko aate the

wo jharne wo chhanw magar sath na chal pate the

waqt tha jo sath chala mere

ek roz wo bhi chala gaya tajarbe ki peTi de kar

ab use bhi uThae chalna hai sambhaale rakhna hai

sanson ki tarah hauslon ki tarah

raste mein milega wo phir se

aur mangega mujh se us peTi mein se kuchh

ya de jaega do chaar aur bhi uThane ko

waqt milta gaya moD aate gae kuchh log bhi

bojh kam hota phir baDh bhi jata

rasto mein bhaTak bhi jata kahin kahin

bojh bhaari hua tha thaki aankhon ka bhi ek bojh tha

buDhape ki choTi ab abhi milon dur thi

par wahan shayad sukun hoga

kahin pahunch jaane ki rahat hogi

chand ki ThanDak mere qarib hogi

us choTi pe pahunch kar

thake hue pairon ko kinare rakh dunga

kyunki wahan se aage ab kuchh na hoga chalne ko

aankh mundne ki mujhe ab ijazat hogi