bujhti hui sard sham

āḳhirī din kā Dūbtā sūraj

terī chaukhaT pe sajda-rez

apnī kirnoñ ke ḳhālī kashkol ulaT kar

thakī huī yaḳh-basta nigāhoñ se

merī duniyā kī tārīk rāhdāriyoñ meñ

guzre hue pal kī kisī pur-afshāñ

saa.at kī talāsh meñ hai

magar tā-hadd-e-nigāh phailī huī maḳhlūq

ḳhāliq-e-lam-yazal se ummīd-e-nau ke kaase phailā.e

apnī palkoñ kī muñDeroñ pe shafaq-rang liye

na.e ujāloñ na.e sūraj kī talabgār banī hai

bujhtī huī sard shaam ke tanhā sūraj

ai pīr-e-falak paikar-e-kohna sūraj

alvidā.a alvidā.a alvidā.a

aaKHiri din ka Dubta suraj

teri chaukhaT pe sajda-rez

apni kirnon ke KHali kashkol ulaT kar

thaki hui yaKH-basta nigahon se

meri duniya ki tarik rahdariyon mein

guzre hue pal ki kisi pur-afshan

saat ki talash mein hai

magar ta-hadd-e-nigah phaili hui maKHluq

KHaliq-e-lam-yazal se ummid-e-nau ke kase phailae

apni palkon ki munDeron pe shafaq-rang liye

nae ujalon nae suraj ki talabgar bani hai

bujhti hui sard sham ke tanha suraj

ai pir-e-falak paikar-e-kohna suraj

alwidaa alwidaa alwidaa