bulawa

nagar nagar ke des des ke parbat Tiile aur bayābāñ

DhūñD rahe haiñ ab tak mujh ko khel rahe haiñ mere armāñ

mere sapne mere aañsū in kī chhalnī-chhāñv meñ jaise

dhuul meñ baiThe khel rahe hoñ bālak baap se rūThe rūThe!

din ke ujāle sāñjh kī laalī raat ke andhiyāre se koī

mujh ko āvāzeñ detā hai aao aao aao aao

merī ruuh kī jvālā mujh ko phūñk rahī hai dhīre dhīre

merī aag bhaḌak uTThī hai koī bujhāo koī bujhāo

maiñ bhaTkā bhaTkā phirtā huuñ khoj meñ terī jis ne mujh ko

kitnī baar pukārā lekin DhūñD na paayā ab tak tujh ko

mere sañgī mere sāthī tere kāran chhūT ga.e haiñ

tere kāran jag se mere kitne naate TuuT ga.e haiñ

maiñ huuñ aisā paat havā meñ peḌ se jo TuuTe aur soche

dhartī merī gor hai yā ghar ye niilā ākāsh jo sar par

phailā phailā hai aur is ke sūraj chāñd sitāre mil kar

merā diip jalā bhī deñge yā sab ke sab ruup dikhā kar

ek ik kar ke kho jā.eñge jaise mere aañsū aksar

palkoñ par tharrā tharrā kar tārīkī meñ kho jaate haiñ

jaise bālak maañg maañg kar na.e khilaune so jaate haiñ!

nagar nagar ke des des ke parbat Tile aur bayaban

DhunD rahe hain ab tak mujh ko khel rahe hain mere arman

mere sapne mere aansu in ki chhalni-chhanw mein jaise

dhul mein baiThe khel rahe hon baalak bap se ruThe ruThe!

din ke ujale sanjh ki lali raat ke andhiyare se koi

mujh ko aawazen deta hai aao aao aao aao

meri ruh ki jwala mujh ko phunk rahi hai dhire dhire

meri aag bhaDak uTThi hai koi bujhao koi bujhao

main bhaTka bhaTka phirta hun khoj mein teri jis ne mujh ko

kitni bar pukara lekin DhunD na paya ab tak tujh ko

mere sangi mere sathi tere karan chhuT gae hain

tere karan jag se mere kitne nate TuT gae hain

main hun aisa pat hawa mein peD se jo TuTe aur soche

dharti meri gor hai ya ghar ye nila aakash jo sar par

phaila phaila hai aur is ke suraj chand sitare mil kar

mera dip jala bhi denge ya sab ke sab rup dikha kar

ek ek kar ke kho jaenge jaise mere aansu aksar

palkon par tharra tharra kar tariki mein kho jate hain

jaise baalak mang mang kar nae khilaune so jate hain!