bulbul

chaman meñ laa.ī hai phūloñ kī aarzū tujh ko

milā kahāñ se ye ehsās-e-rañg-o-bū tujh ko

tirī tarah koī sar-gashta-e-jamāl nahīñ

guloñ meñ mahv hai kāñToñ kā kuchh ḳhayāl nahīñ

ḳhizāñ kā ḳhauf na hai bāġhbāñ kā Dar tujh ko

ma.āl-e-kār kā bhī kuchh ḳhatar nahīñ tujh ko

ḳhush-e'tiqād o ḳhush-āhañg ḳhush-navā bulbul

jigar ke daaġh ko pur-nūr kar diyā kis ne

tujhe is aag se ma.amūr kar diyā kis ne

ye dil ye dard ye saudā kahāñ se laa.ī hai

kahāñ kī tū ne ye tarz-e-fuġhāñ uḌaa.ī hai

tujhe bahār kā ik murġh-e-ḳhush-navā samjhūñ

ki dard-mañd diloñ kī koī sadā samjhūñ

sivā ik aah ke sāmān-e-hast-o-būd hai kyā

tū hī batā tirā sarmāya-e-vajūd hai kyā

vo naqd-e-jāñ hai ki hai nāla-e-hazīñ terā

nishān-e-hastī-e-mauhūm kuchh nahīñ terā

use bhī vaqf-e-tamanna-e-yār kar denā!

nisār-e-jalva-e-gul jān-e-zār kar denā!

hazār rañg ḳhizāñ ne bahār ne badle

hazār ruup yahāñ rozgār ne badle

tirī qadīm ravish dekhtā huuñ bachpan se

hai sub.h-o-shām tujhe kaam apne shevan se

asar-pazīr havādis tirā tarāna nahīñ?

dayār-e-ishq meñ yā gardish-e-zamāna nahīñ?

na āshiyāna kahīñ hai na hai vatan terā

rahegā yūñhī baserā chaman chaman terā

tirā jahān hai baalā jahān-e-insāñ se

ki be-niyāz hai tū hādsāt-e-imkāñ se

tirā faroġh faroġh-e-jamāl-e-jānāñ hai

tirā nashāt nashāt-e-gul-o-gulistāñ hai

tirī hayāt kā maqsad hī dost-dārī hai

tirā muāmlā suud o ziyāñ se aarī hai

azal ke din se hai mahv-e-jamāl-e-jānāna

rahegī tā-ba-abad mā-sivā se begāna

tujhe kis aag ne hirs-o-havā se paak kiyā

tamām ḳhirman-e-hastī jalā ke ḳhaak kiyā

mujhe bhī de koī dāru-e-ḳhud-farāmoshī

jahāñ o kār-e-jahāñ se rahe subukdoshī

matā-e-hosh ko ik justujū meñ khonā hai

mujhe bhī ya.anī tirā ham-safīr honā hai

''tū ḳhush banāl marā bā tū hasrat-e-yārī ast

ki mā do āshiq-e-zārem o kār-e-mā zaarī ast''

chaman mein lai hai phulon ki aarzu tujh ko

mila kahan se ye ehsas-e-rang-o-bu tujh ko

teri tarah koi sar-gashta-e-jamal nahin

gulon mein mahw hai kanTon ka kuchh KHayal nahin

KHizan ka KHauf na hai baghban ka Dar tujh ko

maal-e-kar ka bhi kuchh KHatar nahin tujh ko

KHush-e'tiqad o KHush-ahang KHush-nawa bulbul

jigar ke dagh ko pur-nur kar diya kis ne

tujhe is aag se mamur kar diya kis ne

ye dil ye dard ye sauda kahan se lai hai

kahan ki tu ne ye tarz-e-fughan uDai hai

tujhe bahaar ka ek murgh-e-KHush-nawa samjhun

ki dard-mand dilon ki koi sada samjhun

siwa ek aah ke saman-e-hast-o-bud hai kya

tu hi bata tera sarmaya-e-wajud hai kya

wo naqd-e-jaan hai ki hai nala-e-hazin tera

nishan-e-hasti-e-mauhum kuchh nahin tera

use bhi waqf-e-tamanna-e-yar kar dena!

nisar-e-jalwa-e-gul jaan-e-zar kar dena!

hazar rang KHizan ne bahaar ne badle

hazar rup yahan rozgar ne badle

teri qadim rawish dekhta hun bachpan se

hai subh-o-sham tujhe kaam apne shewan se

asar-pazir hawadis tera tarana nahin?

dayar-e-ishq mein ya gardish-e-zamana nahin?

na aashiyana kahin hai na hai watan tera

rahega yunhi basera chaman chaman tera

tera jahan hai baala jahan-e-insan se

ki be-niyaz hai tu hadsat-e-imkan se

tera farogh farogh-e-jamal-e-jaanan hai

tera nashat nashat-e-gul-o-gulistan hai

teri hayat ka maqsad hi dost-dari hai

tera muamla sud o ziyan se aari hai

azal ke din se hai mahw-e-jamal-e-jaanana

rahegi ta-ba-abad ma-siwa se begana

tujhe kis aag ne hirs-o-hawa se pak kiya

tamam KHirman-e-hasti jala ke KHak kiya

mujhe bhi de koi daru-e-KHud-faramoshi

jahan o kar-e-jahan se rahe subukdoshi

mata-e-hosh ko ek justuju mein khona hai

mujhe bhi yani tera ham-safir hona hai

tu KHush banal mara ba tu hasrat-e-yari ast

ki ma do aashiq-e-zarem o kar-e-ma zari ast