but-saz

maiñ ne kyā soch ke sahrā meñ dukāñ kholī hai

lab-e-la.alīñ ke tasavvur meñ mañgā.e yāqūt

najm laayā huuñ ki tartīb ho silk-dandāñ

mah-e-yak-rū bhī to darkār hai abrū ke liye

duur ufuq paar se thoḌī sī shafaq laayā huuñ

ḳhuun meñ gūñdh ke bhaTTī meñ tapā.ūñgā use

tab kahīñ surḳhī-e-ruḳhsār huvaidā hogī

maiñ ne tayyār kiyā ḳhāk-e-kavākib se ḳhamīr

kuchh nahīñ kuchh bhī nahīñ aaj azā-ḳhāne meñ

aaj ḳhas-ḳhāna-e-ḳhvāhish meñ faqat raakh hai raakh

vo kisī dast-e-hunar-var kā tarāshā huā til

kaf-e-zau-rez ko sharmātā thā māh-e-kāmil

vo tirī sā.ad-e-sīmīñ kā zamurrad bhī ḳhajil

kuchh nahīñ kuchh bhī nahīñ aaj azā-ḳhāne meñ

aaj bhī sochtā huuñ apne junūñ meñ aa kar

maiñ ne kyā soch ke sahrā meñ dukāñ kholī thī

main ne kya soch ke sahra mein dukan kholi hai

lab-e-lalin ke tasawwur mein mangae yaqut

najm laya hun ki tartib ho silk-dandan

mah-e-yak-ru bhi to darkar hai abru ke liye

dur ufuq par se thoDi si shafaq laya hun

KHun mein gundh ke bhaTTi mein tapaunga use

tab kahin surKHi-e-ruKHsar huwaida hogi

main ne tayyar kiya KHak-e-kawakib se KHamir

kuchh nahin kuchh bhi nahin aaj aza-KHane mein

aaj KHas-KHana-e-KHwahish mein faqat rakh hai rakh

wo kisi dast-e-hunar-war ka tarasha hua til

kaf-e-zau-rez ko sharmata tha mah-e-kaamil

wo teri saad-e-simin ka zamurrad bhi KHajil

kuchh nahin kuchh bhi nahin aaj aza-KHane mein

aaj bhi sochta hun apne junun mein aa kar

main ne kya soch ke sahra mein dukan kholi thi