calendar

dhyān kī dīvāroñ se

ga.e dinoñ kī yādeñ kaise utārūñ

is calendar meñ jitnī tasvīreñ haiñ

sab mujh ko jaan se pyārī haiñ

is meñ pahlī tasvīr jo hai

ye merā sahmā sahmā ḳhauf-zada bachpan

jis ke pas-manzar meñ jīvan

sautelī maaoñ jaisī saffākī se mujh ko taktā hai

mahrūmī mere gaal masal kar

roTī kā TukḌā detī hai

aur bhuuk Tahokā detī hai

is meñ duujī tasvīr jo hai

ye sabz laḌakpan kī dahlīz pe

nañge paañv

phaTe libāde

ḳhvāboñ kī ujlī pariyoñ kī sañgat meñ

ik bachchī dauḌī jaatī hai

ik ḳhvāhish uḌtī jaatī hai

rañgīn ġhubāroñ kī sūrat

jo hāthoñ se chhuT jaate haiñ

us meñ aglī tasvīr jo hai

ye bhor samay kī duurī par

ik bastī kī

jis bastī meñ

ik āñgan hai

jis āñgan meñ

ik phuul sadā se khilā huā

ik aag musalsal raushan hai

vo aag

ki jis ko hijr kī andhī rāteñ bhī kajlā na sakīñ

vo phuul

ki jis ko dukh kī garm havā.eñ bhī kumhlā na sakīñ

in tasvīroñ meñ zinda hai

in tasvīroñ meñ raushan hai

dhyan ki diwaron se

gae dinon ki yaaden kaise utarun

is calendar mein jitni taswiren hain

sab mujh ko jaan se pyari hain

is mein pahli taswir jo hai

ye mera sahma sahma KHauf-zada bachpan

jis ke pas-manzar mein jiwan

sauteli maon jaisi saffaki se mujh ko takta hai

mahrumi mere gal masal kar

roTi ka TukDa deti hai

aur bhuk Tahoka deti hai

is mein duji taswir jo hai

ye sabz laDakpan ki dahliz pe

nange panw

phaTe libaade

KHwabon ki ujli pariyon ki sangat mein

ek bachchi dauDi jati hai

ek KHwahish uDti jati hai

rangin ghubaron ki surat

jo hathon se chhuT jate hain

us mein agli taswir jo hai

ye bhor samay ki duri par

ek basti ki

jis basti mein

ek aangan hai

jis aangan mein

ek phul sada se khila hua

ek aag musalsal raushan hai

wo aag

ki jis ko hijr ki andhi raaten bhi kajla na sakin

wo phul

ki jis ko dukh ki garm hawaen bhi kumhla na sakin

in taswiron mein zinda hai

in taswiron mein raushan hai